Iglu boue u drin übernachte…

Am Samti morge si mir viertu ab achti ds Kallnach ufe Zug… ab uf dEngstligenalp…

Vouer Spannig was üs jetz so erwartet hei mir dr Albert, üse Bergfüehrer begrüesst u är het üs ds angere Päärli vorgsteut wo sich äbefaus für Iglu boue u drin übernachte agmäudet het; dMartina u dr Torben vo Züri (Ursprünglech Basel u Dütschland).

Mir hei de ds füft dr gross Schlitte mit Thermomätteli, Schuflene, Sagine, üsne Ruckseck u Schlafseck etc. zum Plätzli ds zoge/gstosse…

Ungerwägs hei mir dSusan troffe wo sich “nume” für Iglu boue, ohni übernachte bir Alpinschueu Adelboden agmäudet het. Bim Igluplatz acho hets scho paar Iglu dört gha vo Vorgänger vo üs u mir hei zersch mau dörfe e Blick uf di Wärk wärfe.

“Äi äi äi”, hani dänkt, dass bringe mir äue nie häre… Dr Albert het Churzinstruktion gmacht wi me jetz äbe so Iglus bout u när hü, hei mir säuber dörfe los la…

Martina & Torben hei es Iglu für sich älei wöue boue, das isch David u mir natürlech grad rächt gsi, de hei mir üs nämlech dra gmacht ou üses eigete Iglu ds boue… D Susan het gfragt öb si bi üs darf häufe u mir si no so froh gsi!!

ds dritt isch nämlech super gange, mir si schnäu vorwärts cho u zwöi Stung später isch üses Wunderwärk voubracht gsi…

I biete jetz nöi ou dPlanig vo Iglus a mit mire Firma…

Es het du Apéro gä mit angerne Lütlis zäme wo äbefaus “nume” si cho Iglu boue u nid übernachte. Di hei sich de ufe Wäg gmacht e Rundi ga Schneeschueh loufe u mir hei de nümme mitne ds tüe gha. D Susanne isch sich de mau ga irichte i ihrem Schlag bim Bärgrestaurant, nid wit wäg vo üsne Iglu u mir zwöi Pärli hei no chli “Freizit gha”. Dass David u i nid chaut berchöme heimer no e schöne Igang a üses wunderhübsche (ohni Seich, isch es Meisterwärk worde!! ) Iglu boue…

Dr Albert isch de zrügg cho u mir hei dörfe üses Schneeschlafzimmer bezieh; zungerst drü Schichte dünni Schumstoffmätteli vor Alpinschueu de üsi Mätteli u obe druf Schlafseck… Tip top, David u i hei so Fröid gha u grad mit zwöi Bierli (Merci Rahel füre Tip mit de Büchsebier ) uf üses Superiglu agstosse u wöus dört inne gar nid so chaut isch, heimer üs Zyt gla zu de angere is Restaurant ds ga (Restaurant isch öpis für Weicheier )…

wo mir üs glich ufe Wäg hei gmacht is Restaurant hei sich di angere scho ufe Wäg gmacht im Iglu ga ds versprochne Fondue ässe wo Albert isch ga vorbereite… Guet si David u i wi gäng ds spät cho… es hät nämlech gar nid für aui Platz gha (shei no drü mit üs Fondue gässe vo däne wo “nume” hei Iglu boue).

Mit voue Büch si mir du ou no schnäu zrügg is Restaurant ga Füess wärme (ja ja, da si mir ja o froh gsi, chli Zivilisation ir Nöchi gha ds ha ) e warmi Schoggi oder es Teeli trinke u gaaaanz wichtig nomau ga brünzle…

När so gäg di 10i hei mir üs mit warme Füess Richtig üses nöie Däheime gmacht… Ruck zuck ine, Schnee abchlopfe, Schueh abzieh, Schiihose abzieh, i Schlafsack schlüpfe, Jacke & Windstopper abzieh u üs ganz i üsi Schlafseck ds verzieh… D Chappe heimer anne gla wöu im Iglu ischs wahrschinlech glich nid viu wermer aus 0 bis 3°…

I ha superwarm gha u di ganzi Nacht nid einisch gfrore, das hät i nie dänkt u bi drum richtig happy gsi

David het tatsächlech mitts ir Nacht müesse ga brünzle, das het bedütet sich a ds leggä, dr schwär Schneechlotz wo mir vo inne hei vor Tür gschobe, wäg ds lüpfe u use ad Cheuti (-10°C)…

zum Glück isch nüt abgfrore u gli het o David witerpfüselet.

Am Morge em 8i hets üs scho chli agsch… üses gmüetleche Nästli ds verlah.

Nach em zMorge im Berggasthof simer ga Iglus usruume, hei Schneeschueh ad Füess gschnaut u e öpe 2 ehaub stündigi Schneeschuehtour bi schönstem Wätter absolviert. Dr Albert het di ganzi Zyt plöiderlet, üs erklärt wi jede Berg ringsum heisst u haut so Fachbegriffe wi (hmm chunnt mir grad kennä me i Sinn :-/ ) erklärt…

Nach dr Tour hei mir uf di zwöi Tag agstosse mit Wisswi, Schnaps u Bier

dr Albert u i si no uf di nöii Snowtube Bahn wome mit so Schwümmringe druf geit… het mir nid so gfaue, shet mi gäng dräit u mit em Rügge gäg ds Tau machts ke Spass…

Öpe em drü hei mir üse ufe Heiwäg gmacht, si rächt müed gsi nach däm Rieseerläbnis-Weekend u hei beidi uf dr Strecki Frutigen-Bern im Zug gschlafe…

Het Spass gmacht, merci Schätzu