Regula: Sydney u wider hei id Schwiz :-((

Montag, 29.03.2010

So iz isches sowit – mir ässe äs letschts Mau z füft Zmorge! Mir verschenke em Dänu u Märu no üsi letschtä Essensvorrät u när geits a z Abschied näh – äs het scho chli hert so nach 1.5 Wuche…

Mir fahre Richtig Sydney u dr Verkehr nimmt immer wie meh zueh. Z Regewetter passt richtig zur Stimmig i üsem Büssli – Truurstimmig, de üs wird iz bewusst, das es langsam z End geit. No 4 Tag Australien u när geits hei zue. I dere verblibende Zyt mues üses gliebte Büssli no putzt, abgä u äs Backpackers gfunge werde. Während dem mir aui i üsne Gedanke versunke si, hupets plötzlech näbe drann – sone Zuefau, mir gseh dr Dänu u Märu no äs letschtsmau uf dr Outobahn Richtig Sydney, bis sich üsi wäge äs paar Km speter trenne. Sie fahre Richtig Manly u mir biege rechts Richtig Miranda – ä Vorort vo Sydney – ab, wo mir nach kurzer Suechi du üse Caravanpark gfinge - gar nüt schöns, aber es erfüllt si Zweck… Mir versueche üsi Kleider, Souveniers  usw. i üsi Täschene z packe! Zum Glück ha ig no ä Täsche meh kouft – so het ömu sicher iz aues Platz!

Nachdem aues versorget isch, fahre mir zure Wöschalag u lö üse Van für 40 Dollar inne u usse la reinige… Super Sach – während mir ä heissi Schoggi trinke, lö mir äs paar Giele la chrampfe – de üse Chickenbus isch würklech mega dräckig! Z einzige wo mir no müesse putze si d Schäftli… När gits no ä Überraschig fürd Prislä – ihre irländisch Fründ, wo si z Perth het lehre kenne, isch extra uf Sydney gfloge um sich nomau cho z verabschide… dr Dec wärde mir Morn nach dr Abgab vom Auto treffe.

…am Abe ässe mir üsi Reste uf, putze nod Schäftli u trinke äs letschts Bandi uf üses Büssli…

Dienstag, 30.03.2010

Nachem Zmorge bräche mir Richtig Zentrum vo Sydney uf u finge du nach es paar chlinere u grössere Umwege endlech d Autovermietig. Da mir i auer Hektik vergässe hei dr Tank z füulle, dörfe mir üs glich no einisch i Verkehr vo Sydney i füege – aber d Prislä meisteret das souverän.

Bir Autovermietig geits du när Blitz schnäu u nach dr Schlüssuabgab bsteue mir äs Taxi, weles üs zumene Backpackers fahrt… da das Backpackers recht tür isch, macht sich d Sabe u ig uf d Suechi nachere billigere Ungerkunft, währendem d Prislä uf üsi tusig hundert Gepäckstück ufpasst… nach kurzer Suechi hei mir du eis gfunge. D Prislä bezieht mit em Dec äs Doppelzimmer ud Sabe u ig verstoue üsi Sache imene 6ser Froue-Zimmer!

Ä so nes schalmpigs Zimmer hei mir no nie gseh… janu, mir müess ja nume 2 Nächt drin übernachte!

Am Abe träffe mir üs no mit em Hannes, wo mir bim Ayers Rock hei lehre kenne. Nachemne feine Ässe ir Jackson Bar, entfüehrt er üs ine extrem nobli Bar, i welere mir ä Usblick ufd Harbour Bridge und z Opera House by nigth hei

mega schön! Leider müesse mir üs gäge Mitternacht scho wider vom Hannes verabschide, da er am nächste Tag schaffet. Während dem mir vieri Richtig Backpackers zrüg loufe, chehre mir no ire Bar i, bis ou die schliesst…

Mittwoch, 31.03.2010

Hüt isch Sydney-Day – mir besichtige d Town Hall (Grichtsgebäude),

fahre mitem Turi-Bus gratis ir Stadt däsume, loufe zum Opera House,

am botanische Garte entlang

zum Macquaries Chair (Ussichtspunkt) u gniesse eifach chli die schöni Stadt…

Dr Abe verbringt d Prislä mitem Dec u ig ud Sabe gö zäme fein ga z Nacht ässe u stosse no eis – zwöi Bandis uf üsi schöne Australien-Ferie a… da mir am nächste Morge am 11 uschequet söte ha u mir doch scho chli im krüzlistich hei loufe, mache mir im Mac no ä Zwüschehaut

isch ä mega luschtige Abe gsi

Donnerstag, 01.04.2010 / Freitag, 02.04.2010

Mir heis scho fasch vermuetet – äs längt üs natürlech nid für uf die 11 uscheque… d Prislä u dr Deck gö fangs säuber no chli d Stadt ga aluege u mir düe gmüetlech zäme packe,

dusche u nachem uscheque loufe mir vo Beizli zu Beizli - hüt isch nämlech wider super Wetter u mir gniesse nomau jede Sunnestrahl!

Am Abe träffe mir du die zwöi bim Opera Hus, wo mir z Apéro nä u sueche när äs Beizli für Znacht esse.

Nachem Znacht müesse mir üs du vom Dec äs letschts Mau verabschide u mir drü verbringe dä letscht Abe no ir Jackson Bar. Ar Sabe u mir merkt me a, das mir scho dr Abe vorher „chli“ gfeschtet hei, mir schlage üs aber tapfer u hautes bis am 2 am Morge düre. Mir luege no äs letschts mau uf die belüchteti Harbour Bridge u loufe när gmüetlech iz Backpackers zrüg wo mir üses Gepäck hei chönne lagere. Mitem Taxi geits zum Flughafe u de heissts Australia Goodbye and Cya… Sniff

Regula

…

…

Ufem Heiflug u dr Empfang ds Züri Kloten:

Merci Froue isch uuuuuuhhh schöööön gsi!!

Sabine