Regula: sünnele… :-) fische… :-))

Mittwoch, 24.03.2010

Da dä Big4 Caravanpark recht sträng isch u mir vorletscht Nacht so ä guete Idruck hingerlah hei, wei mir ja ke Buess riskiere u stöh „früeh“ uf, das mir vor de 10.00 Uhr us chequet hei. Ä Fischer het am Mario ä bsungers schöne Platz empfohle u mir näh dä Weg unger d Reder…

Nach öpe 20 km ufem Princes HWY biege mir rechts i Murramarang Nationalpark i u fahre 10 km düre grüen u saftig Regewald a Pebbly Beach.

Nachdem mir üses Nachtlager i dem naturverbungene Zeltplatz bezoge hei,  gö mir a schön fasch wyss Sandstrand ga plegere. … äs setigs Biud ids Landesinnere vomene Strand us hei mir no nie gha… ä mächtige Regewald u Grashäum wo bis i Sang iche wachse – mega schön!

D Froue verbringe dä Tag mit Läse, Beach-Volley u Beach-Ball spile ud Giele gö wider einisch ga fische.

Aber leider gits o hinech ke Fisch zum z Nacht… Drfür chocht dr Dänu u dr Mario ä super feini Gmües-Teigwahre-Pfanne u mir düe äs paar Würscht u Knoblibrot brätle. Während dem mir am Grill stöh, grase zwöi Kängis ganz z fride näbe dranne.

I dem Nationalpark isches mega ruhig u es het ke Elektrizität u warm Wasser… Isch würklech u schön mau ke Zivilisation u ke Lärm umsich zha uz Läbe i voue Züg u ohni Stress z gnisse…  dr einzig Lärm i dere Rueh isch Vogel-Zwitscher. D Manne hei d Vögu no mit Sandwich gfuetere u mir hei Krähen, Penantsittiche u div. Papageie vo nöchschter Nöchi chönne fötele.

Nachem Esse het üs i die Rueh iche doch tatsächlech no äs Possum bsuecht – äs het die dreckigi Pfanne wo am Bode gläge isch, usgschläcket!

Donnerstag, 25.03.2010

Ussert Prislä wo dr Sunneungergang geit ga fötele, schlafe mir hüt us u düe när gmüetlech zmörgele.

D Manne bräche ihres Gelage ab u fahre Richtig Norde witers… Mir verbringe dä Tag no einisch mit nüt mache am Strand.

Am vieri fahre mir när o los, verlöh dä ruhig Ort u fahre ufe Caravanpark z Ulladulla, wo sech dr Dänu u dr Mario bereits igrichtet hei. Si hei hüt sogar 3 Fisch gfange u die gäbs de Morn zum Apero.

Mir verbringe no ä gmüetleche Abe bi Würschtli, Hamburger u Salat u gö de mau ga lige…

Freitag, 26.03.2010

O hüt zeigt sich z Wätter wider vor beschte Site – mir beschliesse, da mir die letschte 2 Mönet so viu gseh u erlebt hei, das mir d Blue Mountains nüm besichtige u eifach no chli d Sunne uz Nütmache gniesse. D Sabe geit a Pool, da si dört WiFi het, u duet äs paar Ferie-Fotos uf ihri Homepage ufe lade. D Prislä u ig gö a Strand u beobachte dr Dänu u dr Mario bim Fische.

Si hei hüt scho wider Glück u mir chöi, nachdem si die Fische usgno hei, feini Fischknusperli zum Apéro ässe. Aus Hauptgang gits när no Chicken-Spiessli mit Teigwahresalat u mir verbringe no ä gmüetleche Abe mit tusig hundert luschtige Gschichtli. Hmmmmmm

Samstag, 27.03.2010

Am Morge stöh mir bi Zyte uf u gniesse äs gratis z Morge mit Pancakes, Ahornsirup u Confi, weles dr Caravanpark abietet… Fein!

Dr Chickenbus u dr Wicketcamper fahre när Richtig Wollongong u mir überchöme z Wollongong wider einisch Iblick ine grösseri Stadt…. Mir finge o hier ä Caravanpark direkt am Strand. Da dr Strand am offnige Meer isch, hei mir mit de Welle u dr Ströhmig feiechlei z kämpfe… Mir probiere üs im Body surfe – deune glingts ä chli besser aus angerne Zum z Nacht gits ä Käs- u Fischplatte u äs paar interessanti Shots, wo d Froue im Bottle Shop entdeckt u kouft hei….

Hmmmmmmmm – äswird ume einisch „früech“!

Sonntag, 28.03.2010

Jaja, mir schlafe us u ässe när Rüehrei mit Tomate u Käs zum Zmorge… Da d Sunne sich hinger de Wulche versteckt u mä am Strand ufgrund vom heftige Wind fasch Sanggstrahlet wird, profitiere mir gärn vom Spa-Agebot vom Caravanpark. Mir schwümme äs paar Züg im gheizte Pool, schwitze z „Gift“ im Dampfbad use u entspanne üs im Whirlpool. Da mir üs Morn vo üsne liebe Schwitzer-Giele trenne gits nomau äs richtigs Herreässe zum Znacht! Hamburger zum säuber baschtle – isch u fein gsi u mir hei üs aui masslos überässe… nachemne gmüetleche u chli melancholische Abe gö mir när aui ga schlafe…

Regula