Priska: Vo Melbourne Richtig Sydney

Dienstag, 16.03.2010

Äntlech chöi mir dä superfründlech Caravanpark verlah u fahre näbe dra ufe Parkplatz vom Woolworths. Wöu mir nümme hei zum zMörgele isch afa mau ichoufe agseit. Stinkfräch packe mir üsi Stuuh us u ässe Croissants mit Nutella.

Us Melbourne use ds cho isch gar nid so eifach aber dSabe isch es Super – GPS…

Mir fahre knapp 300km uf Bairnsdale. Es rentiert fasch nümm uf Lakes Entrance ds fahre wöus scho so spät isch, drum gö mir hie ufe Caravan Park. D Reglä u dSabe lige a Pool u i ga no schnäu ids Dörfli für ga ds shoppe.

Am Abe loufe mir i Mac füre für ds zNacht, so cha dSabe no uf ds Internet. I ha gester es Jobagebot übercho u telefoniere mit mim wahrschinlech zuekünftige Chef. Merci Enno für ds vermittle!!

Um Mitternacht loufe mir dür das mönschlääre Dorf zrügg zum Caravan Park.

Mittwoch, 17.03.2010

Höt morge wet mir vo Bairnsdale uf Lakes Entrance fahre wöus dört e schöne Strand söu ha. D Sabe fahrt rückwärts us üsem Platz u macht Bekanntschaft mit dr Strasselampe. Zum Glück hei mir sones stabius Trittbrett hingedranne süsch hät mir jetz e idrückti Stossstange. So isch nume ds Trittbrett chli lädiert.

Lakes Entrance isch es chlises Fischerdörfli mit ere schöne Promenade. Mir schlendere zersch chli dä Lädeli nache, trinke es Ischcafée u mache üs de ufe Wäg a Strand. Mit gmüetlech bade isch aber nüt hie, es het mega höchi Wäue u mi mues e ruhige Zytpunkt abwarte für hurti ids Wasser ds ga.

Gäge Abe berchöme mir langsam chaut u mache üs ufe Wäg e Caravan ds sueche. Scho gli gö mir is Bett, nume dSabe tigeret ume di haubi Nacht ume wöu si nid cha schlafe u lehrt drfür drü nätti Spanier kenne…

Donnerstag, 18.02.2010

Höt Morge wo mir ufstöh isch nid würklech schöns Wätter. Wahrschinlech hets ir Nöchi brönnt, es schmöckt emu dr na u ir Luft hets ganz viu Rouch. Wöus am Strand so ou nid schön isch, fahre mir witer über dGrenze vo New South Wales uf Eden. Es isch es komisches Gfüu dür di abbrönnte Wäuder ds fahre, zum Teu gseh mir no chlineri Füürli u Rouchschwade.

Süsch isch Gägend schön grüen u gseht fruchtbar us.

Ds Eden im Infozenter ghöre mir wi eine grad uf berndütsch am flueche isch. D Sabe cha sich natürlech nid zrügg ha u lat ou e Spruch la ligge. So chöme mir mit em Mario us Uetendorf u mit em Dani vo Dörflingen (Sh) ids Gspräch. Di zwöi Jungs si zäme bi dä KFOR (Kosovo-Force) im Kosovo gsi u si jetz zäme am umereise. Mir beschliesse üs ufem gliche Caravanpark ume ds träffe. Es het grad eine direkt am Strand, mir bruche nüme über dStrass ds loufe – sehr gäbig

Nach em zNacht hocke mir no zu ihne übere u trinke es paar Bier. Nachdem mir scho ds zwöite mau ufgforderet wärde chli lisliger ds si, chöme mir uf di glorrichi Idee ga ds nacktbade, so störe mir emu niemer meh… Mit Usnahm vom Dani wo sini Schlarpe vergässe het am Strand, gö mir nach däre Abchüelig u däm Abentür äntlech ga schlafe.

Freitag, 19.03.2010

Guete Morge! Ja mir hei aui chlei e Kater u dr ganz Caravan Park kennt üs nach däre Nacht Mir zmörgele u berchöme Bsuech vo Papageie. Mir fuetere ihne natürlech chli vo üsem Brot, bis üs dr Nachbar seit, dass si vo ds viu Brot chöi stärbe, dHefe tuet ihne nid guet. Ups, scho wider öpis fautsch gmacht! ;- )

Item mir verlöh üse „Garten Eden“ u fahre zäme mit dä Jungs 30km witer uf Merimbula, luege schnäu bim Infozentrum verbi für di wichtigste News u gö i Mac. Uf em Caravanpark finge dr Mario u dSabe e Eggä ganz für üs älei, dass mir hie niemer me belästige.

Zur Begeisterig vo aune hets dört sogar es Beachvolleafäud u mir spile es paar Matchs. Leider verlüre mir Froue immer bim entscheidente Spiu :-/

Aber es fägt mau ume einisch chli Sport ds mache. Mir fröie üs scho aui sehr uf ds zNacht wöu dr Mario u dr Dänu üs versproche hei Spätzli ds mache. Drzue gits Chickenspiessli u Bratwürscht mit Zibelesauce. Mhhh… soooo fein

Samstag, 20.03.2010

„Klopf, klopf“ machts a üsem Outo…  mittlerwile ischs haubi eufi u mir sötte äue mau ufstah. D Reglä het scho Angst, dass mir e Buess überchöme u usem Caravanpark gschosse wärde aber dSabe reglät dass souverän u buechet no einisch e Nacht. Nach em gmüetleche zMörgele fahre dr Mario, dr Dänu u ig ids Stedtli Merimbula für ds shoppe. Eigentlech hei mir dänkt es het ä Märit aber dä isch ersch morn. Mir choufe no chli Alkohol u dManne Köder u Hägge zum ga fische. Nach drü Stung simer ume zrügg u finge dSabe u dReglä am Strand  unger.

Di letschtä Sunnestrahle gniesse mir, wöu vom Hingerland chöme grossi schwarzi Wouche drhär u mir hoffe s chunnt nid cho rägne!!

Churz bevor mir zrügg gö gseh mir e grossi Gruppe Delfine ganz noch am Strand elegand verbischwümme – so cool. Am Abe wei Dänu u Märu ga fische, mir Froue spaziere ids Dorf abe zum ume einisch usswärts ga ässe. Es het es super mexikanischs Restaurand direkt am Hafe womer Quesadillas u Fajitas ässe. Ds Sabe u dReglä finge es nöis Lieblingsgetränk “Mexican Mocha”…

Zirka am haubi eufi chöme di zwöi Jungs ou no id Beiz,… leider hei si nüt gfange, schins sig nid guets Wätter gsi u dFluet u überhoupt…

Ja seit me de aube…

Natürlech gö mir no witer ids Pub. Dört hets e Liveband u mir drinke no eis zwöi oder ou drü…

Sonntag, 21.03.2010

Mir schlafe ume mau chli nache. Am haubi zwöufi mache mir drü Froue u dr Mario ufe Wäg für a Märit, dr Dani schlaft no chli lenger. A däm chline Dorfmärit chame vo Pflanze über Schmuck u Spiuzüg, bis zu Büecher fasch aues ha. Aschliessend luege mir no bim Mac verbi wöu mir no wei dMails checkä.

Am Nami gits e Revanche im Volley für üs Froue, di Niederlag lö mir nid uf üs la hocke. Leider verlüre mir scho wider ds entscheidende Spiu… Nach ere Abchüelig im Meer spile di angere no es paar Matchs witer, i gibe Forfait wöu mir dr Arm weh tuet. Höt Abe wärde mir nid so aut u gö scho gli ga lige.

Montag, 22.03.2010

Höt isch ume einisch Platzverschiebig agseit. Dr Dani u dr Mario mache sich fang ufe wäg e guete Caravan Park ds sueche. Mir hei zersch no es witers Problem a üsem Oute ds behäbe. Dr Mario het gseh dass bim linke Vorderrad überhoupt ke Profil me druf isch u me scho ds wisse Grüst gseht. Nach em 10te mau probiere Travellers Auto Barn, üsere Outovermietig ds erreiche, hani dr John am Telefon wo üs ane Garage ds Merimbula verwist. Dört acho heisst si chönni das nid mache wöu si ke Vertragspartner vo Travellers Auto Barn si. Drfür flicke si üses ladierte Trittbrätt dank üsem charmante Lächle für nume 10Bugs … Mir wärde ids nächstgrössere Dorf uf Bega gschickt wome üse Pneu de äntlech wächslet u dRächnig grad direkt a Vermieter schickt. Si flicke die leidiste 2 Pneu u wächsle si so, dass beidi Nöie vore si.

Während däre Zyt gö mir id Badi chli ga bädele u ga sünnele. Ou die hei mir fasch für üs eleini . Am 5i fahre mir los Richtig Batemans Bay wo dr Mario u  dr Dani e Platz für üs reserviert hei. Zum zNacht gits de ume chli Jack Daniels, Bundi/Coke u Bier…

Dienstag, 23.03.2010

Hmmmm sisch e längi Nacht worde…. üs Froue u am Dani geits eigentlech guet, nume dr Mario isch am lide u dämentsprächend am jammere. Höt gits mau ume e Strandtag. Mir bruche nume di 200m übere Platz ds loufe u si scho ire gmüetleche Bucht. Mir gniesses i voue Züg ds läse, ds sünnele u no chli nache ds schlafe. Am Abe luege mir ir Chuchi chli Fernseh, spile „Tschou Sepp“ u gö scho gli is Bett.

…

Priska