Flinders Nat. Park, Adelaide, Great Ocean Road…

Samstag, 06.03.2010

Mir gö bi Tom’s Working Mine ar Prisle’s Opal-Ring u mi Steiahänger für ume Haus ga hole, tscheggä dört no schnäu dMails u mache üs ufe Wäg i Flinders National Park. Em 4i chöme mir a u gö is Visitor Center.

Üsi liebe Östricher hei üs empfohle e Rundflug ds mache wöu me vo obe dGrössi u dStrukture vo däre kraterähnleche Landschaft am beste gseht. Wöu ds Wätter rächt sunnig isch beschliesse mir dä Rundflug no höt ds mache u e Haubstung später chöi mir bereits im chline 4-Plätzer Flugi Platz nä… dPrisle darf Co-Pilot si wöu si no nie mit somne chline Pfüpfi isch gfloge

Es isch interessant über di Hügle ds Flüge, nume mi Mage het nid so fröid ab de Luftlöcher wo sich haut nid lö la vermiede… vo obe gseh mir, dass ds ganze Gebiet mit de gliche Strücher bewachse isch u me bire Wanderig nid würklech verschiedeni Landschafte würd entdecke…

Am Abe stosse mir uf das bsundrige Flugabentür mit emne B52 Shot a u gniesse di paar Sunnestrahle… scho parat für is Bett hei mir du dsGfüu, dass chönns doch nid si amne Samsti Abe scho am 9i is Bett – mir lege üs wider a u gö no ids Restaurant/Bar, bzw. mir tappe im dunkle quer dür e Caravan Park zwüsche Böim düre bis mir du de dr Wäg finge

Prisle macht no es Telefon u mir vertörle üs im Internet u bire warme Schoggi bzw. bimne Bundi/Coke…

Sonntag, 07.03.2010

Guet hei mir dä Rundflug no gester Abe gmacht!! Es rägnet nämlech wider mau, scho am morge früeh!! …obwou mir doch widermau ufne sunnige Tag ghoffet hei.

Ds zMörgele isch im Campervan agseit u mit ere ir  Mikrowäue gwermte Schoggi starte mir i Tag.

Di chlini Wanderig zum Wangara Outlook mache mir bi füecht u rächt chautem Wätter bevor mir witer nach Adelaide fahre…

Gemäss Stadtplan vom Lonely Planet Reisefüehrer fahre mir ds Adelaide aus erschts dür ds Stadtzentrum, dass mir scho mau wüsse wo sich dRundle Mall u angeri wichtigi Sache befinde u finge dr Adelaide Shores Caravan Park ir Nöchi vom West Beach uf Ahieb… Nützt de viu wenn er usbuechet isch …

Dr zwöit wos no gäbi sig ou usbuechet. Mir luege öbs am Strand es Plätzli mit öffentleche WC’s zum übernachte git. Sgseht schlächt us u mir übernachte vis à vis vom Caravanpark ufem Parkplatz vom Tenniszentrum – gratis u Duschi/WC bruche mir glich die vom Caravan Park

Mitts ir Nacht erwache mir aui wäg emne ekuhafte Grüsch u merke du dass di blödi Sprinkleralag für dRasebewässerig au Minute mau vou a üses Outo sprützt… Prisle parkiert de schlafbetrunke üse Chickenbus uf di angeri Parkplatzsite u mir pfüsele i Rueh witer…

Montag, 08.03.2010

Mir si gar nid motiviert uf ds stah wöu ds Wätter himmutruurig usgseht

I ga du ga dusche zum wach wärde u Prisle, Reglä cheggä fängs i, dass mir emu für di nächsti Nacht de ä legale Übernachtigsplatz im Caravanpark hei…

Mit em Bus wei mir üs ufe Wäg i di schöni Stadt Adelaide mache… haub abgfrore wäg däre chaute Bise, chunnt de nach knapp ere Stung äntlech dä Bus – mir verstöh das nid u hei ds Gfüu völlig unfähig ds si dä Busfahrplan richtig gläse ds ha. Wo du ir Stadt acho sämtlechi Läde zue hei frage mir bim Infostang nache u üs wird aues klar… höt isch e Fiirtag wöu es internationals Pferderennä, e bekannte Strassekünstler-, u verschiedensti angeri Aläss stattfinge – drum fahre dBusse höt nach Sunntigsfahrplan; mir si auso doch nid ds blöd gsi dr Fahrplan ds läse.

Us üsem „Lädelitag“ wird nüt u mir höckle bimne deckte, härzige Houzofebeizli vorusse häre u studiere dMenucharte… Mhhh shet mega spannend, fein tönendi Vorspise, Houptmenus u Desserts, dass mir üs ewigs nid chöi entscheide was bsteue – aber mir hei ja Zyt

Nach em feine Ässe schländere mir dür ds zZentrum vo Adelaide u luege paar Strassekünstler zue… Mir bestuune bsundrigs es cools Strassekünstlerduo wos mit Hebefigure, Seilchlättere u sogar Trapezturne ächt im Griff het!!

Aha da fingt es Open-Air Festival am Endi vor einte Strass statt. Gseht nach ere grosse Sach us u mir erkundige üs nach em Pris u nach em Programm. Das isch ds Future Music Open Air wo einisch im Jahr stattfindet u nume ei Tag duuret. Dr Itrittspris isch AU$ 150.- , ziemlech happige Pris. Aber wöu dLäde nid offe hei, mir schliesslech nume einisch ds Adelaide si u dPrisle paar Bands kennt, entscheide mir a däm Festival teil ds nä… Ohni Alkohol isch das ganze nid lustig u drum probiere mir üs möglechst schnäu am Pegu vor Mehrheit uf däm Gländ a ds passe u hole mau zwöi Rundine Bundi-, bzw. Jack Daniels/Coke…

Empire of the Sun si schliesslech ds High Light für üs u wöu si nid gemäss Programm ufträtte hets nid so viu Lüt vor dr Büni u mir hei schön Platz zum dance … Dr DJ wo när bis am Schluss ufleit isch ou nid so schlächt u mir lö richtig dSou use!!

Hei müesse mir mit emne Taxi wöu ke Bus meh fahrt aber uf di 32 Dollar chunnts de ou nümm a…

Dienstag, 09.03.2010

Mir schlafe beruhigt us, wöu ds Wätter nid besser usgseht… dBusse fahre zum Glück wider nach normalem Fahrplan u gli si mir wieder im üs bereits bekannte Stadtzentrum. Zersch gö mir ir Stadtbibliothek ga käfele u vom Gratisinternet profitiere (tja mir, bzw. i cha haut scho nid ganz ohni Internetkommunikation läbe, da i i Gedanke sehr hüfig bereits bim anstehende Umbau bi). Stadtbesichtigung mit Gratisbus isch agseit. Aus erschts luege mir dr schön Botanisch Garte a…

Leider blühie im Spätsummer nümm so viu Blueme aber isch glich schön. Bir schöne katholische Victoria Chiuche mache mir dr nächst Haut.

Vo dört loufe mir zrügg id Rundle Mall. Mir gö ume ids schöne Wood Oven Restaurant ga e Pizza ässe u chli ga si…

Mit em Bus geits de ume „hei“ i Caravan Park u gli is Bett.

Mittwoch, 10.03.2010

Wäg wichtige Mails wo i no muess verschicke (ja genau wäg em Umbou ds Kallnach), fahre mir paar Rundine dür Adelaide zum nomau vor Gratis Wirelessverbindig vor Stadtbibliothek ds profitiere. När füehrt üs dr Wäg nach Mt. Gambier. Kilometerwit fahre mir a Pink Lakes (mängisch sis ou meh Brown Lakes ) verbi uf relativ kurvige Strasse u bi immer no bewölktem Himmu. D Vicher wos uf dr Windschutzschibe verjagt bestöh fasch nume us Wasser i däre Region :-/ u sgit rächt durchsichtigi Fläcke Usserdäm gseh mir vili „Langgras-Tarnschaf“ (mir säge däne so)… Holzwirtschaft isch i däre Region anschienend e wichtigi Inahmequeue, shet überau i Reih u Glied apflanzti Böim wo sehr künstlechi Monowäuder darsteue – us Nadelholz u paar grossi houzverarbeitendi Industriebetriebe.

Ds Mt. Gambier gö mir dr Blue Lake, e See imne Vulkankrater ga aluege bevors idunklet wöu ds Wätter einigermasse schön isch u mir nid wüsse öbs morn äch ume rägnet.

Iquartiere tüe mir üs im Caravan Park grad näbe dran, dReglä versteckt sich ume hinge inne u mir zahle wi üblech nume zwöi Persone…

Donnerstag, 11.03.2010

Guet si mir dä Blue Lake wo würklech extrem blau isch gester no ga aluege wöu ds Wätter höt isch ume himmutruurig

Bevor mir witer Richtig Great Ocean Road fahre luege mir glich no schnäu di angere zwöi Vulkankrater u ds spezieue Garden Sink Hole a.

Vor dr eigentleche Great Ocean Road luege mir dBay of Islands a u berchöme scho e erschtä Idruck vo däne Kalksteinfigure wo ou di bekannte 12 Apostels drus bestöh.

Ds Peterborough berchöme mir es härzigs günstigs Plätzli ufemne Caravanpark wo mer es eigets Hüsli mit WC, Brüneli u Duschi hei Vorher si mir no schnäu im Bottle Shop gsi u zum zNacht gits e Klatsch u Tratsch Rundi uf Reglä u Prisles Bett mit Bundi/Coke u Bier – e Guete!!

Freitag, 12.03.2010

Höt steit dr grösst Teu vor ach so bekannte Great Ocean Road uf em Programm u YES!! nach paar hässlech chaute Täg weckt üs ume mau dSunne. Si ma sogar scho bim zmorge werme u dReglä isch optimistisch u schmeisst sich grad is Bikini …

Tatsächlech chöi mir di Kalksteinfigure; The Grotto:

London Bridge:

The Arch:

bi schönstem Wätter bestuune. Ds Port Campbell lige mir 3h a Strand zum üsi Körper u Gmüeter ume mau uf ds heize u paar Postcharte ds schribe. Es macht scho viu us, wenn ds Wätter schön isch. Nach wenige km chöi mir ou dLoch Ard Gorge:

u di Twelve Apostles:

bi schönstem Wätter aluege. Zum fötele ischs haut nid so gäbig wöu dApostle vor dr Abesunne stöh aber mi cha nid aus ha…

Beände tüe mir dä wunderschön Tag im Otway Caravan Park u dank däm, dass e Koala vom Boum abebrünzlet, entdeckt dReglä zwöi freiläbendi Qualas uf verschiedene Böum paar Meter näb üsem Chickenbus …

Nach emne Chnoblibrot, Suppe u paar Drinks geits ab is Bettli… Mir hoffe uf witeri so schöni, scho bau letschti Täg vo üsem „Big Australia Journey“!!

Samstag, 13.03.2010

Am Morge isch aues extrem füecht u nass wöu ds Wasser überau kondensiert het, drum sueche mir zwüsche de vili Eukalyptus- Böim dSunne zum gmüetlech zMörgele. Bevor mir dr zwöit Teu vor Great Ocean Road erkunde, spaziere mir mit Blick id Boumchrone no chli düre Caravanpark u entdecke zwöi ginendi, sich i Zytlupetämpo kratzendi, Eukalyptusbletter mampfendi u gli wider schlafendi Koalabärli

Ir Otway Range spaziere mir ufem „Mait’s Rest Walk“ düre mega chüu, früsch u ruhig (wenn nid grad e dütschi Reisegruppe entgäge chunnt) Rägewaud mit faszinierende bis über 2m höche Farnböim.

Nach öpe hundert Kurve über dGreat Ocean Road chöme mir ds Lorne a u suche dErskine Falls. Ir Touriste Information empfähle si üs dr Teddy‘s Lookout mit Blick uf dGreat Ocean Road. Auso gö mir zersch dä ga aluege u när zu däm zirka 30m höche Erskine Wasserfau. Mir luege dä vo obe u nach 250 Stägetritte ou vo unger a.. Abe si di Stägetritte ja easy…

Im Stedtli ds Lorne gseh mir so viu Touriste wi no nie uf üsere ganze Reis. Zum Glück fingemer e Parkplatz im Zentrum, gö zur Post ga Briefmarke choufe u füue üsi Mäge mit sehr gsungem fritiertem Food :-// När lige mir a Strand u gniesse di letschte Sunnestrahle vo däm schöne Tag… swird relativ früeh chaut – isch haut nümme Summer

Ds Geelong berchöme mir im Caravan Park dPlatznummere 15, di isch scho bsetzt, drum parkiere mir ufem 16i. Mir chunnt i Sinn, dass i ja mini auti Beachvolleybaue bereits 8 Wuche mitschleppe u no nid mau ufpumpet ha… D Prisle macht sich scho mau über ds Strassesystem vo Melbourne schlau u dReglä u i spile chli Volleyball mit anschliessend chlinem Chraft u Strechteu läck si mir scho igrostet :-/ aber wi chönnts ou angers si weme gäng nume im Outo hocket u öpe es Bier suuft.

Nach üsem Sportprogramm gseh mir ganz e huufe Flughüng wo äue grad aui ufgstange si u sich ufe Wäg mache ds Frässe sueche – was frisst e Flughung??…

Sonntag, 14.03.2010

Dank Reglä’s Tip gö mir Sovereign Hill, e nachebouti Goldgräberstadt ds Ballarat ga aluege. Es lohnt sich würklech. Ds einzige was närvt si di 40 Stutz Itritt u när muesme dinne für Minetoure u angeri Sache nomau zahle!! Mir luege ds ganze Stedtli a; luege i Zäut u Hüsli wo si so um 1851 drin gläbt hei, mache di chlini Red Hill Minetour wo me gseht wi schöns isch gsi wenn si hei Gold gfunge u dGoldminentour wo zeigt het wi elend dass Minenarbeiter si gstorbe wenn di ungerirdische Gäng plötzlech mit Grundwasser gfluetet oder zämegheit si – di hei es verdammt herts Läbe gha u me si äue ds Grund gange aus me höt a nimmt… usserdäm luege mir zue wi me Holzwage Räder früecher u höt no härsteut u nach ere Erfrüschig ir Hope Bäckerei bsueche mir ds Goldmuseum bis mir definitiv keni witere Goldgschichtli meh chöi im Hirni ufnäh

Es längt no bis Melbourne ds fahre u nach lengerem Sueche finge mir de ou dr apeilt Ashley Caravanpark wo mit 9km Entfärnig em nöchste im Stadtzentrum ligt.

Am Abe hocke mir mit drüne fründleche Schwizer zäme wo ou mit emne Campervan ungerwägs si… es isch e lustige Abe wo bis am Morge am 2i duret…

Montag, 15.03.2010

Wöu dr gestrig Abe lenger duuret het aus dänkt schaffe mirs ersch churz vor dä 12i mit em Bus „Sunshine 220“ ids Stadtzentrum vo Melbourne ds fahre…

Abgseh vom Gratistram wo besser beschriftet u dSehenswürdigkeite erklärt wärde isch Adelaide mit Abstand viu di schöneri Stadt.

Mir lädele u ds Highlight näb mire nöie Umhängetäsche u Kitsch-Schmuck woni mir choufe si Zäiechlemmerschlarpe-Socke

farblech passe die zwar äue grad zu gar nüt aber egau, houptsach si si praktisch!! D Reglä het sich Zäiechlemmerschlarpe u ou Kitsch-Schmuck kouft u dPrisle es Gschänkli für es Familiemitglied (darfi jetz äue nid meh verrate )…

Mir ässe imne gmüetleche Restaurant näb em Fluss „Yarra River“ fein Pizza u Pasta, gseh dSkyline vo Melbourne no bi Nacht u mache üs mit em Sunshine-Bus ufe Heiwäg i Caravanpark…