Happy Birthday Sunshine, Reto, Wadi, Chrigu u aune angere wo höt Geburi hei !!

Für mi git das höt e ganze bsundrige Geburi uf dr angere Site vor Wäut…

Am Morge stöh mir ferieverhäutnismässig früeh uf, dass mir gnue früeh ids Infozenter chöi ga zum plane öb mir e 4×4 wei miete für ids Rainbow-, u Palmvalley oder evt. besser e Tour bueche…

Dr Tag faht abgseh vom sehr sehr bewöukte Wätter guet a wöu mi Prisle u Reglä mit emne chline Geburigschänkli überrasche …

Nachdäm üs e nätte Agsteute im Touristezentrum verzeut, dass Palm Valley sit u für di nächste paar Tag bzw. Wuche nid erreichbar wird si u ou dSchluchte wo normalerwis mit Campervans erreichbar si wäge äbefaus wäg-, oder überschwemmte Strasse nid chöi bsucht wärde, gseh üsi Gsichtsusdrück öpe glich us wi ds Wätter… Fazit: Hie ds Alice Springs gits abgseh vom Todd-River wo Wasser füehrt

(dä Fluss heisst uf jeder Charte „normalerweise ausgetrocknetes Flussbett“) absolut nüt spannends ds gseh. Mir überzüge üs mit eigene Ouge, dass di Strasse nid passierbar si, bsueche zwöi unspektakuläri Klufte u nütze de dä Nami zum wäsche, ichoufe, Wösch hänke u de kille mir zur Feier des Tages dr in Denmark kouft Blauberi-Likör u eröffne so ds Geburtstagsapéro mitts im Nami.

Ga ässe gö mir im Red Ochre Grill u bsteue dr empfounig 3-Gänger mit T-Bone Steak. D Vorspis u ds Dessert si himmlisch… auerdings hei mir hie no nie so „nidfeins“ Steak gässe … Mit paar Bundaberg/Cokes lö mir dä Abe la usklinge

na ja i wirde mi 29. trotzdem nie vergässe !!

Donnerstag, 04.03.2010

Usschlafe isch agseit

Bi schönstem Wätter ässe mir ds zMorge u si zimli ratlos wi mir dr Tag wei verbringe… am sinnvouste wärs sofort witer ds fahre wöu mir üs Alice Springs definitiv hätte chönne spare!! Aber a Gedanke dä Postchartewättertag eifach mit fahre „ds verschwände” chöi mir üs ou nid gwane… D Prisle fahrt id Stadt zum sich evt. es Didgeridoo oder e schöne Cowboy Huet ds choufe, Reglä u i lige a Swimming Pool u gniesse eifach dSunne …

Am Mittag träffe mir dr Thomas u dr Johannes, zwöi supersympathischi Östricher wo mir bim Uluru hei lehre kennä (si hei per Zuefau bis nach Alice Springs di glichi Route uf em Programm, fahre de aber nachher obsi nach Darwin) verbringe dr Nami bi 2 Bierli u quatsche.

Si si härzig, schänke mir es „Boxing Plüschkängi“ zum Geburi, wöu das aber „heilig“ sig (wi dWasserlöcher vo dä Aborigines) darf me vo däm kes Föteli mache .

Gli si mir üs einig, dass jetz ds spät isch zum no Richtig Coober Pedy loszfahre, gö ga dusche u im Overlander Steakhouse üs dBüch ds grächtem ga vouschlah!!…

Ds Menu, wo mir nach im 2te Gang hei Känguruh-, Emu-, Kameu-, u Krokodiufleisch probiert u im 3te Gang es riese Steak, bzw. e grosse Baramundifisch hei verdrückt isch suuuperfein gsi.. Mir hei üs eifach fasch nümm chönne bewege u mi hät üs i Bo`s Saloon chönne rugele… :-// Verdouerli kenne si ds Australien nid würklech…

Dank Bundaberg- oder Wiskycola u em 3km länge Spaziergang i Caravan Park hei de üsi Mäge doch no afa verdoue .

Freitag, 05.03.2010

…so isch dä Plöischlitag mit „üsne Östricher“ ds High Light vo Alice Springs worde …

Nachdem mir üs churz u schmärzlos vo üsne nöie Fründe hei verabschiedet, fahre mir am 10 los, Östrich Richtig norde u Schwiz Richtig Süde… Dr Chickenbus chunnt nach über 600km am 5i im autbekannte Coober Pedy a. Dr ganz Tag hei mir ke Hunger – aui si no am Rumpsteak oder Baramundi verdoue

Nach ere Rundi schwümme im Pool, gniesse mir bim trochne mau no di 20Flöige wo eim ufem ganze Körper umchrabble u nach em autbekannte Abeprogramm geits ab in die Heia, dass mir morn fit si für e letscht gross Fahrtag… es ma üs scho chli – mir hei richtig Spass übercho am kilometerwite Fahre u drbi eifach chli id Wäutgschicht use ds tröime u zum x-te mau über e Sinn vom Läbe nache ds studiere …