Regula: Im Härz vo Oustralie…

Mittwoch, 24.02.2010

Nachdem mir üse Essensvorrat wider ufgstocket hei, geits du endlech los u mir fahre Richtig Herz vo dem grosse Kontinent. Mir si scho aui richtig gspannt druf ds bekanntiste Wahrzeiche vo Australien dr Uluru (Ayers Rock) ga z bestune. Üses Ziel für hüt isch Coober Pedy, weles 537km nördlech vo Port Augusta ligt…

Während dem das d Sabe ihres neue Tatoo zeichnet, verändere sich d Landschaftsbilder bau au 50km.

D Farb vom Sang geit vom beige zu pupurrot über u wider zrüg iz beige, einisch rage höchi Böim usem Bode u när wider nume chlini vertrochneti Büsch, mir gseh grossi Salzseene, Emu‘s u natürlech diversi Autowracks, wo vor sich häre roschte…

Z Coober Pedy acho, bsueche mir z Visitor Center u informiere üs über die verschidene Mine, wo meh cha ga aluege. In Coober Pedy isch 1915 dr erst Opal dür Zuefall gfunge worde. Sit denn het das Fieber viu Lüt packt u hüt sueche i däm 3‘500 Seele Dorf 1‘500 Digger us 45 Natione nach wertvolle Opale. 90% vom Opalvorkomme vor ganze Welt wird hier z Coober Pedy und im nahe glägne Mintable gförderet.

Nachdem mir üs im Caravanpark im Pool erfrüscht hei, spaziere mir no chli dür ds Dorf u gö üs ir Ungergrund-Bar ga erfrüsche. Dr Barman het so Freud ab üs,  das er üs ä spezial Shot zäme steut…

hmm, fein. Das üs scho chli trümlig isch, gö mir aschliessend id John’s Pizza Bar no öpis feins ga ässe u mache üs när ufe Heiweg.

Donnerstag, 25.02.2010

Nachere uruhige Nacht (Hitz u so ganz höch-tönendi no nie ghörti Mücke!) stöh mir hüt am Morge voller Tatedrang uf u fahre aus erschts zur Tom’s Working Opal Mine. Dr Tom empfaht üs herzlech u präsentiert üs ä 7 min. Dok-Fium. Vor 150 Mio. Jahr isch d Gegend um Coober Pedy mit Salzwasser überfluetet gsi. Wo sich du när dr Grundwasserspiegel gsenkt het, het sich Kieselsäure-Gel bildet u das het sich ide Holhrüm agsamlet, verhertet u opalisiert. Mä het soger opalisierti Skelett vo Wassertier gfunge. När hei mir du chönne die Mine, wo no in Betrieb isch, ga aluege. Mir hei zwar keni Arbeiter in Action gseh, drfür het d Sabe fasch z Opal-Fieber packt.

Nachdem mir d Sabe fasch hei müesse useschleiffe u üsi Heume zrüg gä hei, het üs z Rosi – ä Dütschi wo vor Jahrzente usgwanderet isch – no d Wertbestimmig vomene Opal erklärt. Z Coober Pedy finge si vorauem die helle, milchige Opale. Je meh Regebogenfarbe ä Opal drinne het, desto wertvoller ischer. Si het üs o gseit, das leider die Junge d Stadt verlöh u keni Diggers nache chöme, obwous no so viu Bodeschätz zum gfinge gäbti… Dankend für die interessante Infos fahre mir witers zure  Serbisch Ortodoxe Ungergrund Chiuche. Ds spezielle a dere Chiuche si vor auem die schöne i Stei iche ghoune Bilder ud Glasmalereie – u natürlech das si i Ungergrund boue isch worde.

Aus Verglich zur erschte Mine, gö mir iz no d Old Timers Mine ga erkunde. Ä Mine wo sehr liebevoll  u detaillgetreu rekonstruiert isch worde. Äs aschliessends Museum u Ungergrund Hus het du die Tour abgrundet.

Vom Rosi hei mir no dr Tip übercho, iri Kollegin im Experience Motel ga z bsueche, wüus dört opalisierti Muschle zum aluege git. Gesagt getan - mir hei z Debi zwar nid atroffe, aber ä nette eltere Herr het üs die Sammlig u zuesetzlech no äs Ungergrund-Hotel-Zimmer  zeigt. Isch würklech interessant gsi…

Dr Lookout het natürlech nid dörfe fähle – aber däh empfehle mir würklech niemerem! Coober Pedy isch würklech ä Geisterstadt…

 Da mir mit so viu Infos gfueteret si worde, gö mir du no uf Shopping-Tour, das ja i däm Stedtli über 15 Opal Shops git… äs hets zwar nid aui überzügt, so dass nume ig viu Geld bi los worde!

U o dä Abe hei mir mitemne feine Znacht bi Tom & Mary’s Greek Taverna la usklinge…

Freitag, 26.02.2010

Hüt stöh mir früech uf, da mir ä längi Fahrt vor üs hei. Bevor mir die 737 km unger d Reder näh, fahre mir no churz bir Tom’s Working Opal Mine verbi, da d Prislä dört ä schöne Ring gseh het, wo sie sich no einiesch gneuer wet aluege. Si entscheidet sich du für dä Ring u da er chli z gross isch, wird dr Ring no verchlineret. Mir wärde dr apasst Ring bim retour Fahre nach Adelaide cho abhole zäme mitemne Chöteli, wo fürd Sabe ono apasst mues wärde. So hei mir doch no aui öpis gfunge!

Dr Bode Richtig Zentrum wird iz immer wie röter…

u was isch das…?? 1, 2, 3 Rägetröpf! Im Red Center – die hei sich äue verirrt! Aber nei, je nördlecher mir fahre, desto meh fats afa rägne! Das gits ja nid, äs regnet im Zentrum! Hier wos doch pro Jahr nume 200mm regnet. Einersits freue mir üs, da d Landschaft sicher grüener wird si, auses die meiste Touriste je gseh hei, aber wie lang wots äch no regne?

Gäge die vieri chöme mir z Yulara (20 km nördlich vom Uluru) a u gö iz Info-Center. Für die näschte Täg isch würklech unbeständigs Wetter agseit. Mir entscheide üs, ke Tour z bueche, da mir doch aues relativ eifach säuber chöi erkunde…

Nachdem mir im Caravanpark ä Platz reserviert hei, bräche mir Richtig Kata Tjuta (Olgas) uf um ds bekannte Farbeschouspiu bim Sunneungergang z bestune…

Mir gniesse üses z Nacht mit Blick ufd Olgas, aber leider gseh mir ke grossi Farbeveränderig, das doch immer no recht bewölkt isch… aber die 36 Hügle fasziniere üs o so!

Samstag, 27.02.2010

Da mir hüt dr Sunneufgang nid wei verpasse, heissts früech ufstah… Äs regnet leider, aber mir beschliesse glich üses Glück bide Olgas z probiere… Mir warte gspannt ufe Sunneufgang, aber leider isches hüt no bewölkter aus gester, das grad gar nüt zwöue isch…

Mir ässe z Morge im Chickenbus u fahre zum Parkplatz wo dr Valley oft he Winds Walk afat. Dä Rundweg duret 3 Std u mir näme dä i Agriff! Was eifach fantastisch usgset, si die farbige Blueme u die grüne u saftige Strücher u Gräser überau…

äbe grad gar nid so, wiemes ab der Postkarte kennt! Ab und zue regnets, aber chaut isches zum Glück nid… dank em Wind u em Rege hets ömu sicher nid so viu Flöige wie schüsch aube… phuuuu! Aus zwöiti Wanderig isch dr Stündig Walpa Gorge Walk ufem Programm gstange. Die Wanderig füehrt zwüsche zwe Kupple id Olga Gorge, i welere sich iz soger äs chlises Bechli mit ix Kaulquape agsamlet het…

Da mir recht müed si, fahre mir Richtig Yulara, choufe ih u gö zrüg i Caravan Park. D Prislä u ig vertribe üs d Zyt mit Charte schribe u läse. D Sabe geit ufs WC u wo si nachere haub Stung immer no nid zrüg isch cho, gö mir si du mau ga sueche… Aha, si hocket bi zwe Jungs vorem Camper u trinkt mit ihne äs Bierli – üse Vorsatz mau ä Tag kes Bier trinke, isch scho mau gschiteret. De d Prislä u ig gseue üs o i die luschtigi Rundi u mir verbringe mit de zwe Östricher Giele n o ä gmüetleche Abe…

Sonntag, 28.02.2010

Eigentlech hei mir hüt dr Sunneufgang bim Uluru wöue ga bestune, aber das o hüt am Morge rägnet , schlafe mir us. Nachdem mir usgibig zmörgelet hei us immer no nid schöner Wetter isch, entschliesse mir üs hüt aus erschts z Kulturzentrum vom Uluru-Kata Tjuta National Park z bsueche. Das Kulturzentrum bietet de Bsuecher ä Vielzahl a Uskünft über d Anangu (so nenne sich die Aborigine, weli ume Uluru wohne) Kultur. Si zeige eim uf, mit was für Werkzüg d Manne gjagt u us welne Beeri, Strücher u Wurzle d Froue z Ässe zuebereitet hei. Wie si hüt mit de „wisse Australier“ zäme de Park füehre u ou über d Gschicht vor Entstehig vom Nationalpark hets interessanti Brichte zläse gä. Am 26. Oktober 1985 isch d Anangu dr Uluru nach länge Rechtsstritereie wider i ihre Bsitz zrüg gä worde, auerdings hei sie sech müese verpflichte, das dr Nationalpark zu touristische Zwecke für 99 Jahr a Staat verpachtet wird… I zwe Shops hetme när no de Aborigines ihri traditionelle Handwerk (Bilder, Holzschnitzereie) chönne bstune u natürlech – we me het wöue – o choufe.

Nachdem  würklech interessante Bsuech si mir du Richtig Uluru ufbroche u hei dr 10.4 km Wanderweg, wele ume Uluru füehrt, i Agriff gno. Das so stark windet, si mir o hüt vor Flöige-Plag verschont blibe. Während sich Rege ud Sunne chli abwächsle, gseh mir spannendi Löcher u Figure im Felse.  Bim Wasserloch lauft sogar – dank em Rege – ä dünni Wasserrinne vom Berg obe abe uds Wasserloch isch äue scho lang nüm mit so viu Wasesr gfüut gsi.

Ganz ir nöchi chöi mir ono Felsmalerei bestune.

So wie bide Olgas hets o hie ume ganz Berg ume fruchtig grüeni Greser u Strücher… Nach öpe 4 Stung hei mir du dä Walk gschaft gha u si Richtig Sunneungergang-Ussichtspunkt düset, wo mir vom Uluru öpe 100 glichi u ähnlechi Föteli gmacht hei…

Montag, 01.03.2010

Hüt heists wider früeh ufstah! Mir fahre zum Sunneufgang-Ussichtspunkt bim Uluru u bestune mit x-100 angerne Touriste :-/ das Wahrzeiche!

Chum isch d Sunne ufgange gsi, si die Lüt vo eire Sekunde uf die angeri verschwunde u mir hei - fasch alleini - dr idrucksvoll Berg bim Zmörgele no chönne in stiller Rueh gniesse… bis üs zwe – wider ganz sympatischi Österreicher – agsproche hei.

Da z Wetter immer no nid dr Hit isch, het niemer Stress gha u mir hei chlei über Gott und Welt gret…

…da üses Lenkrad sit 2 Täg extrem hert het zum lenke, gö mir hüt idi örtlechi Garage. Dr Keilrieme für Übersetzig zum Lenkrad isch grisse u dä wechsle si ruck zuck ines paar Minute . Mir si froh isches nume so öpis chlises! Mir fahre no zum Shopping Zenter u choufe äs paar Souveniers i bevor mir när dr Weg Richtig Kings Canyon i Agriff näh…

Regula