Priska: Ab nach Southern Australia…

Samstag, 13.02.2010                

Höt morge simer vom Caravan Park ds Jerramungup di guet 300km uf Esperance gfahre. Di meischti Zyt ischs a chline Wäuder u grasende Chüeh verbi gange. Ds Esperance acho simer zersch is Visitor Center üs über Caravan Parks u di nöcheri Umgebig ga la informiere.

Da dSabe uf ds Internet het wöue simer ids nächstglägne Taylor Street Jetty Cafe diräkt am Hafe vo Esperance. Mir hei no nüt ds Mittag gha u gönne üs e glustige Lunch vor Menucharte. Am spätere Nami gö mir a Westbeach no chli ga bädele u dSabe u dReglä üebe Aerobic.

Am Abe beschliesse mir, dass ume einisch Zyt für i Usgang isch u mache üs ufe Wäg is Pub Si hei Karaoke Night… (Aber mir singe nid, ke Angst ) Mir lehre zwöi nätti Kiwis (Neuseeländer) kenne…

Sonntag, 14.02.2010                

Nachdem mir herrlech usgschlafe u zmörgelet hei, bräche mir churz vorem Mittag uf ufe Great Ocean Drive. E 36km längi Rundfahrt entlang vo dä schönste Stränd vo Esperance

sehr empfehlenswert! Mir fahre zersch mau rundum zum luege wo dr schönst isch. Üsi Wau faut uf dSalmon Bay womer dr ganz Nami bade, sünnele u läse. Am Abe gömer no mau ids Taylor Street Jetty ga zNacht ässe u schliche üs heimlech i Caravan Park zum Uebernachte.

Montag, 15.02.2010                

Da mir üs höt morge mau einisch hei müesse usem Stoub mache, heimer nume schnäu es paar Toastbrot i Toaster gschosse u si i 50km entfärnt Cape le Grand Nat. Park gfahre. Im Lucky Bay Caravan Park müesse mir üse Platz sichere, da dr Park gäng relativ usbuechet isch. Nachem zMörgele packe mir üsi Sache u gö a wunderschön schneewiss Strand mit kristauklarem Wasser.

Dr Räste vom Tag lö mir üs dSunne uf e Buch la schine… Ds spezieue a däne Stränd i däm Nat. Park isch dr puderzuckerfin Sang.

Dienstag, 16.02.2010                

Letscht Nacht isch es starchs Gwitter mit viu Blitz u Donner über üs hinwäg gfägt. Drum hei mir aui nid würklech guet gschlafe u dSabe het sich i däre Nacht am Himmu znoch gfüut. Am nüni bräche mir uf dr 262m höch Frenchman Peak ds bestige. I weiss dir wärdet jetz lache wäg somne chline Hoger..Aber dir heit ke Ahnig wi stotzig dä isch gsi!!

Vo dobe het me e wunderschöni Ussicht ufe Nat. Park u die umligendi Küste. O e grossi Echse hei mir gseh. Nach em Abstieg wo mega id Chnöi isch, gönne mir üs e Abchüelig ir Thistle Cove.

Mau wider e Strand ganz eleini für üs – so geil!! Zum zNacht gö mir ume nach Esperance i üsi „Stammbeiz“ (mir si richtig fan vom Taylor Street Jetty!)

Mittwoch, 17.02.2010                

Nach ere witere unruhige Nacht – emu für dSabe (mir hei unger emne Boum parkiert wo e Ast di ganzi Zyt am Outodach krauet het) – gniesse mir üse letscht Tag ds Esperance ar Salmon Bay.

Am 4i näme mir die 200km nach Norseman unger dRedär. Norseman isch e Goudgreberstadt u dr Start vo üsere Reis dür die 1‘300km laengi Nullarbor Plain.

Viu meh aus es paar Baraggene, Tanksteue, eim Campingplatz u 1‘000 Flöige gits hie nid!

Donnerstag, 18.02.2010                

Üser schlaflose Nächt gö witer, dasmau wäg dr Hitz u mindestens 20 Mügge wo sich i üse Van gschliche hei… Ahhhhhh!! Am Morge mache mir üs ufe Wäg zur Nullarbor. Nullarbor chunnt vom Latinische „Nullus Arbor“ u heisst „kein Baum“. Zwüsche Balladonia u Caiguna fahre mir uf dr lengste schnuergrade Strecki vo Australien: 146.6km.

Nach meh aus 700km chöme mir ds Eucla a u beschliesse hie üses Nachtlager uf ds boue (sprich üses Outo ds parkiere ), vorauem wöu mir gseh hei, dass es hie e Bar het…Eucla isch 12km vor Südaustralische Gränze u mir müesse üse Früschvorrat vo Frücht u Gmüess ässe, wöu mir die Sache nid nach SA chöi übere nä. Natürlech gö mir no id Bar (dört schaffet e sehr schlächt gluunti Barmaid) Zigis hets ou keni – dank däm lehre mir zwöi oustralischi Grenzwächter kenne. Da di Superbar am haubi zähni (ke Witz) scho zuetuet, lade üs dr Brett u dr Andy no zumne Bierli bi ihne däheim i. Mir verbringe no zwe gmüetlechi, lustigi Stunge bi däne Zwenä u dr Andy bietet üs a am nächste Morge mit sim Oldtimer es Usfährtli ds mache. So wärde mir doch no dMüglechkeit ha di heimleche Schätz vo däre Einöde ds gseh.

Freitag, 19.02.2010                

Am haubi zäni stöh mir bim Brett u bim Andy vor dr Türe. Dr Brett muess leider ga schaffe aber dr Andy nimmt üs mit sim Schätzli, amne 39jährige Ford ufene Sprütztour mit. Är zeigt üs bir Gränze e mumifizierte Dingo wo ihre Höhli igsperrt isch gstorbe (vor x Jahr).

Nächher si mir ga ds Outo tusche u mit em 4×4 bsueche mir dRuine vor aute Telegrafestation.

Witer geits mit dr Besichtigung vom aute wunderschöne Jetty u dä Sanddüne vo Eucla.

Es het sich glohnt e haube Tag dört ds verbringe wöu nid viu Touriste wüsse, dass es uf däre „einsame Strecki“ öpis ds gseh git. Am Mittag fahre mir witer mit üsere Tour dür dNullarbor.

Da mir erfahre hei, dass si üs ersch ds Ceduna (500km östlech) am Checkpoint kontrolliere, chöi mir üsi rästleche Frücht uz Gmüess doch no ässe (es het Tomate Toast zum zMorge gä).

So längi Steckenä ds fahre het sini eigeti Faszination. Mi het viu Zyt zum nachedänke. Es isch ou interessant wi sich dLandschaft veränderet. Höt fahre mir kilometerwit dr Küste entlang u es isch topfäbe. Wöus so heiss isch flimmerets richtig am Horizont u mi het ds Gfüu mi fahrt gli i Himmu… Nach 420km chöme mir ds Penong a u übernachte hie…

Samstag, 20.02.2010                

Mir fahre vo Penong Richtig Port Lincoln uf dr Suechi nach schöne Stränd. E Dütschi het üs gseit es heig wuuunderschöni Stränd i däm Port Lincoln South Australien Zipfu. Zersch haute mir ds Streacky Bay a u mir hei no nie so ne hässleche Strand z Australien gseh..!!

Üsi Muwinkle si aui öpe 2cm abe grütscht u ir Hoffnig doch no chönne ds bade fahre mir witer Richtig Süde… Ir Venus Bay finge mir e Strand wo sich nume Pelikän wou füehle. Üsi Hoffnig no e aständige Strand ds finge schrumpft…Ds Elliston stöh mir bim Visitor Center vor verschlossnige Türe u e Lade het ou kenne me off… Mir gö ir einzige Bar i däm 300 Iwohner grosse Kaff ga es Frust- Bundaberg/Coke bzw. Bier suufe. Tatsächlech zeigt sich plötzlech no dSunne u dr Strand isch o nid ganz so hässlech ds Elliston. Dä Strand i däre Bucht erinneret üs chli a Bielersee wöu ds Wasser nid so klar u rächt chaut isch. Mir nähme e Übernachtigsplatz im Waterloo Caravan Park u gö ds Fuess i däm Pub/Restaurant ga ässe (da ja ke Shop me offe u nume das Restaurant offe het, hei mir schnäu entschiede )Haub Elliston geit äue am Samsti Abe dört ga ässe u mir beaspruche 3 Plätz vomne 8ter Tisch. Näbe üs spricht üs es nätts Pärli (um die 50gi) a wöu sis sehr spezieu finge, dass drü „jungi Froue“ zum ässe je e Stange Bier (Bucket) trinke… Mir chöme mit ihne ids Gspräch u heis u lustig. Dr Kenny het e Farm, 30km vo Elliston entfärnt wo scho sit 100 Jahr im Bsitz vor Familie Bascomb isch. Mir hei si chli uszeut wöu hie am Samsti Abe niene öpis louft. Er het du gfunge mi chönn scho Party mache, begleitet üs id Bar u steut üs es paar „Friendsson’s“ vor, wo zwar fasch aui jünger si aus mir aber rächt hübsch Das isch dr erscht Usgangsabe worde, wo di ganz Zyt eine vo de Jungs oder dr Kenny si ga ds Trinke hole, bevor mir hei läär gha.. dä Abe isch dämentsprächend füecht, fröhlech u vorauem fuer ues gratis verloffe…

Sonntag, 21.02.2010

Erstunlecherwies geits ar Reglä u mir huet morge relativ guet, aber d Sabe het ae chline Hangover vo gester Abe. Wie abgmacht, fahre mir zur Ingrid und Kenny Bascomb. Ihri Farm ligt guet 30 km vo Elliston entfernt. Sie hei 8000 ha Land, 400 Schaf, 40 Hirsche (zum Gspass aus Hobby) und ca. 40 Rindviecher. Aber dr Houpterwerb chunt vode Austere und Abalon-Muschle wo si ar Kueste due zuechte. Zum z Mittag chunt no am Kenny sini Muetter, d Cousine Sue u ihri Tochter d Chelsea. Natuerlech gits Sea-Food u mir si mega gspannt. Mir 3 aesse zum Erschte mau i uesem Laebe Austere. Fazit: si si guet aber mir wuerde die nid unbedingt imene Restaurant bsteue. Aes git ono Lobster (Hummer) u King Prawns (Riesecrevetten) und zum Schluss im Anke pratteni Abalon-Muschle…

Nachem z Mittag zeigt ues dr Kenny sini Farm. Mir fahre mitem 4×4 ueber grossi Weide, wo aer sini Tier het und mir gseh aes auts Huettli, wo si aus Ching immer ihri Fruehligsferie verbracht hei (mit Holzofe u ohni Elektrizitaet). Bimene Wasserreservoir muess er ae toti Geiss use zie, wo waehrend em Wasser trinke isch ine gheit. Er zeigt ues o Loecher wo d Wombats grabe zum sich z verstecke - leider hei mir no immer kes Unversteckts gseh.

Z Land wo si hei, isch leider nid sehr fruchtbar. Es het viu Steine und es grosses Problem si Millione vo chline Schneggli, wo ihne z Gras fresse! Drum het aer sich o ae angere Erwerbszweig muesse sueche. Dr Wert vo dere Farm isch oepe 1.5 Millione, was fuer die groessi nid wuerklech viu isch… Es wird o fuer d Bure hier z Australien immer schwieriger z ueberlebe.

Nachdem mir wider deheim si acho, choei mir no mit ga Schaf zaeme z tribe, wo morn abghout werde. Die zwoei juengere Ching, dr 16-jaehrig Ross und die 13-jaehrigi Natascha hauefe tatchraeftig mit und fahre mitemne 125er Toeff und emene Quad scho wie Profis desume. D Schaf waerde ine Chaefig iche tribe und aschliessend sortiert und gwoge.

Mir verabschide ues u fahre no guet 2 Stung witers uf Coffin Bay. Es isch ae sehr ae interessante Tag gsi fuer ues aus Buretochtere und es isch cool gsi mau ae Iblick ines australischs Farmerlaebe z bercho.

Montag, 22.02.2010                

Mir schlafe mau ume einisch us wöu mir no nid genau wüsse was mir höt eigentlech wie mache. Nach em zMörgele gö mir ds Coffin Bay uf Post für ufs Internet. So het dSabe ume mau dMöglechkeit öich mit de nöiste News und Fotos ds versorge. Schlussendlech hocke mir aui fasch drü Stung vor de Compis u mache üs am haubi drü ufe Wäg i nahglägnig Coffin Bay Nat. Park.  D Strass i däm Park isch kurvig u het viu Höger. Am Golden Island Lookout finge mir e schöne Strand wo mir hurti is Wasser gumpe.

Das isch mega chaut u di Iheimische säge dass es hie Lachse u Haie het (di hei ou gärn Lachse ). Süsch gits hie leider nid viu ds gseh. Faszinierend si dSanddüne mitts ir buschige Landschaft. Dört chame leider nume mit 4×4 düre fahre . Mir fahre witer uf Port Lincoln u wette no schnäu ids Visitor Center. Super das het leider scho zue… Drum gö mir mit hungrige Mäge ga ichoufe u dämentsprächend wird’s tüür… Direkt am Meer finge mir e schöne Caravanpark u gönne üs es Mäntigsbier (Tja Sabes Allergie chunnt nämlech nid vom Alkohol ) Zum zNacht tüe mir ume einisch grille, es git feini Chicken/Kebap-Spiessli… Hmmm…

Dienstag, 23.02.2010                

Mir merke, dass mir ume im Süde unger si, aui hei chaut gha ir Nacht . Zum Glück lachet üs bim zMörgele scho ume dSunne a. Mir luege churz bim Visiter Center verbi u berchöme paar Tips vo Schmuckläde u „very nice small towns“ wo sich ufem Wäg nach Port Augusta befinge. Ds Tumby Bay lege mir üse erscht Stop ir Gold Factory i, es chlises härzigs Lädeli. Dört produziere si Schmuck us houpsächlech Gold aber ou Silber. Si gö fougendermasse vor: Zersch mache si es elastischs Gumminegativ us dr Originaufigur; Seepferd, Muschle, Seestärne etc. När biudesi di Figur mit Hiuf vo id Form ine presstem Bienewachs. Ab däm fertige si es Gipsnegativ a wo när ds Gold, bzw. Siuber i gosse wird. Au di Schmuckstück si inne nid hou u drüm megatüür.Bim Muschuschmuck tüe si di obersti Schicht vor Muschle wägätze so chunnt di glänzigi Perlmuetoberflächi zum Vorschin.Witer geits uf Port Neill womer i Tanplaters möchte. Mir chöme grad ir Mittagspouse a u müesse bis am haubi zwöi warte, dass dr Lade ume uftuet. Mir gö dr nid würklech lohnenswärt Lookout ga aluege, ässe öpis ds Mittag u Punkt haubi zwöi stöh mir ume vor em Lade.

Dr Bsitzer begrüesst üs höchstpersönlech u zeigt üs e churze Fium über ihres Handwärk. The Australien Eucalypt Collection besteit us Eucalyptusblätter wo dröchnet u aschliessend elektrostatisch mit Kupfer u Nicku beschichtet wärde. Im letschte Vorgang wärde di Bletter ine Süüri toucht so dass das schöne Farbespiu zum Vorschin chunnt.D Reglä u i choufe üs je Ohreschmuck.Bim nächst grössere Dorf (es si aus relativ verschlafni Kaff, very nice isch e Riesübertiebig gsi), ds Cowell möchte mir i Jade Schmuck Lade. Scho wider stöh mir vor verschlossniger Tür. Zum Glück hanget dört e Zettu wo üs dr Wäg ids Jade Hotel zeigt wo mir die  Schmuckstück doch no chöi ga aluege. Mir nähme ir Beckerei näbe dra zersch no e chlini Erfrüschig, fahre no schnäu zum Hafe ir Hoffnig ufne schöne Strand (aues womer finge isch e suuuper Swimming Pool!!) u fahre de zu däm Hotel u finge e erstundlech grossi Uswau a Ohrstecker, Hauschöteli, Armbändeli u Fingerringe. D Reglä chouft sich es Siuberchöteli mit emne schne Ahänger us Amethyst u dSabe e Ahänger u passende Ohrschmuck us grüener Jade plus e schöne Ahänger us Zebrastei. Dä speziu Stei chunnt nume ds Nordwestoustralie ir Kimberley Region vor. So geit üse Schmucktag ds End (d Sabe muess de gli ume ga Gäud uselah ;-)) u mir fahre witer nördlech a riesige Weizefäuder verbi nach Port Augusta.

Am Hafe gniesse mir no dr Abe u dSabe gumpet no es letschts mau is Meer wöu mir de morn ids heisse Red Center nach Coober Pedy fahre…

Priska