…ds Südwestoustralie…

Freitag, 05.02.2010                

Nach ere witere chaute Nacht (i bi fasch erfrore) u emne gmüetleche zMorge mache mir üs ufe Wäg dr Busselton Jetty ga besichtigä. Leider gseht dä nid grad super us momentan wöu si nä renoviere.

Im Lonely Planet ha i paar Tag vorher per Zuefau gläse, dass es ds Busselton es Autokino git. Drum gö mir üs am Nami ga erkundige öbs das Chino würklech git u was für ne Fium würd loufe…

Mir schlendere chli dür Busselton, gönne üs Crepes, Waffle mit Glace  oder eifach e Glace, bezieh üse Platz im Caravan Park (di si hie im Süde viu günstiger aus im Norde!) Ds Ässe gits ume mau gmischte Salat mit Räschte us em Chüuschrank – isch aber fein När mache mir üs meh oder weniger hübsch für i Usgang. Ds erschtä mau für aui bsueche mir es Outochino. D Atmorsphäre u ds Drumherum si wäsentlech besser gsi aus dr Fium säuber (Did you hear about the Morgans). Mir hei ds Outo verchert häre gsteut u ds ungere Bett ufbout. So hei mir richtig gmüetlech chönne Fium luege.

Leider si di Boxe so lisli igsteut gsi u mit üsem Gschwürradio im Outo hanis nid gschafft di richtigi Frequenz i ds steue zum so chönne ds lose… :-/ So ha ig nid viu verstange, zum Glück isch aber dä Fium überhoupt nid kompliziert gsi – mi het a eire Hang chönne abzeuge wi är wird usgah… Mega müed gö mir zrügg uf üses Plätzli u nachem Zängputze schlafe mir gli i.

Samstag, 06.02.2010                

Mir erloube üs us ds schlafe Sit mir nüm im Norde si hei mir verhäutnismässig weni ufem Programm u nämes chli gmüetlecher. Cape Naturaliste stüre mir a u spaziere ire Stung rundum e Lüchtturm

di 11AU$ zahle, nume dass me überhoupt zum Lüchtturm zuche darf loufe, finge mir e Frächheit u verzichte druf dä Turm vo noch ds gseh.

Gnue früeh, dass ds Visiter Center ds Margaret River no off het chöme mir dört a bueche e Wytour für morn, Sunnti. Zur Feier des Tages oder eifach so gö mir ume mau usswärts ga ässe (s git Rieseportione u  i ha es schlächts Gwüsse dHeufti zrügg müesse ds gä…)

Nachem Ässe spiut e längwiligi Folk Rock Band. Bevor mir a Ort u Steu ständligse ar Bar ischlafe gö mir gli mau hei. Es rägnet di ganzi Nacht u i schlafe u schlächt wöu gäng grossi Rägetropfe vo dä Böim uf ds Outodach gheie u das befindet sich ja nume 50cm über mim Chopf

Sonntag, 07.02.2010                

Am haubi eufi hei mir müesse bim Rezeptionshüsli si u gli druf het üs dr Georg mit sim Bus abghout für üsi Bushtucker Tour ; i 4 verschiedenen Winerys verschiedeni Wys u Likörs probiere, e Chäs- u ne Schoggilade bsuche sowie ire Brauerei 4 verschiedeni Bier teste – so het das Programm usgseh. Ufem erschte Wyguet si aui no stif u ruhig gsi…

Zersch het üs dr Georg erklärt wime ds Glas het u i ha das super gfunge wo er zeigt het wi e Biertrinker s Glas häbt (so wi mä äbe nid sött ) När het er üs erklärt, dass Biertester dr Wy wider usespöie u Wytrinker nä trinke – es het natürlech niemer o nume ei Schluck usegspöit Ufem zwöite Wyguet simer scho chli uftout u dStimmig isch gäng chli lockerer worde, nachdem mir di angere Lüt hei müesse lehre kenne u im Bus nüm näbe denä hei dörfe hocke wome kennt Dr Georg  het ds zMittag für aui parat gmacht; Känguruh, Truten u Rindfleisch, Salat, Chäs komischi Gin Tonic Früchtli mit verschiedene Chutneys u igleite Champignons u Gmüess… Die wo hei wöue hei zum Vorus no e Delikatesse dörfe probiere; e Bitz vomne wisse feisse Madli!! Vo dä „Switzerland“ Gruppe het niemer dHang ufgha… :-/ :-/

Dr dritt Platz wo mir hei bsuecht wird id Gschicht vo üser Reis i ga… aus pindlechsts Erläbnis ever…D Liköre dört hei üs mega überzügt. Zu feine Drinks gmixt hei mir Verschiedeni dörfe probiere!!

Drum si mir uf di extrem gschidi Idee cho aus Souvenir je es Glas la mit ds loufe… obwou si schins am Afang gseit hei, dass si dGläser zeue!!! (Vo üs het das niemer ghört oder verstange ) – na ja isch rächt pinlech worde u aui Ouge si uf üs grichtet gsi. Wo dReglä möglechst unuffäuig :-/ ihres u mis Glas het zrügg gä het üs dr Chef vo dört u dBarmaid gäng no abartig bös agluegt u gseit, dass immer no es Glas fähli… Mir hei scho Fröid gha, dass öper anger us dr Gruppe ou es Glas het wöue mitnäh… nüt isch gsi – drü Schwizer, drü Gläser hei gfäut – di dritti isch nämlech unabhängig vo Reglä u mir  dPrisle gsi wo o gärn so es Glas hät mitgnoh… “hihi”

Am Schluss het sich usegsteut, dass dOustralier dä Zwüschefau extrem lustig hei gfunge… Haha!!

Nach Schoggi u Chäs degustiere si mir de zum Schluss no ine Bierbraui (vor Brauerei hei mir auerdings nüt gseh) u ga 4 verschiedeni Bier ga probiere (mi het müesse zahle für die!!…) Wöu mir üs no gschämt hei, si mir chli witer wäg vom Räst vor Gruppe ab ghocket

Fasch aui vor Buschtucker Tour Gruppe si im Pub usgstige, dAtmorsphäre isch extrem locker u fröhlech gsi u nachdem si es paar Mau wäg üsem missglückte Glasdiebstau hei grinset, hei mir scho säuber ab üs müesse lache.. Im gliche Pub wi mir gester hei gässe u när die längwiligi Folk Band het gspiut, heimers plötzlech mega lustig obwou Sunnti Abe isch

Mit si du nach Wy u Bier uf Bundaberg/Cola umgstige …u plötzlech mit viune Lüt ids Gspräch cho, sogar dReglä het plötzlech super Englisch chönne hihi

Dr Bruce wo em Bob Marley mega ähnlet u öpe si Läbensstiu läbt… het du gfragt öb mir zäme gäge Angeri wei Billard spile… Em Gägner si Partner isch niene me gsi u dPrisle isch igsprunge.

Em 10i het das Pub scho zue ta u da si si extrem sträng – si hei mis no voue Büchsli eifach abgruumt… es isch e schlächti Idee gsi das probiere zrügg ds erobere. Woni em Servierboy bi acho isch keni 10 Sekunde gange när het mi dr Securitas i höchem Boge usem Pub gheit

E Kollegin vom Bruce het üs zu sich hei iglade u si no angeri Kollege vo ihre mitcho u no Lüt wo weder si no mir kennt hei… E junge Sänger mit Gitarre het es paar u schöni Lieder gsunge, mir hei chli Didgeridoo probiere ds spile…

Öpe em haubi eis gömer hei – Guet het Prisle u dReglä dr Wäg no gwüsst !!!

Montag, 08.02.2010                

…Jaaa mir hei drü chlini Kater… mir schlafe us u müesse wäge däm no pressiere, dass es längt am 10ni us ds checke…

Sit fasch ere Wuche ha ig e Usschlag wo ufem rächte Oberschänku het agfange u sich när usbreitet het uf beidi Bei sowie uf dArme. Abgseh dr vo das es hässlech usgseht bisst das Ganze ou no schrecklech… mir hei chrampfhaft überleit woher das chunnt u uf was i jetz plötzlech so allergisch reagiere. Jetz isch so schlimm worde, dass mir ids Spitau fahre – dört verwise si mi zum ne Arzt u uf die 11.15 Uhr berchumi e Termin… I befürchte, dass mir dä Arzt ou nid cha witerhäufe. Es isch e nätti Ärztin u si isch sich zimlech schnäu sicher, dass das vom schwitze chunnt unger dä Chleider u dür ds Chraue hanis schön uf Arme u Bei verteut… Si verschribt mir e Wäschlotion woni di Bakterie cha abwäsche u e Saubi wo di Keime sött kille. Hoffentlech würkt de das gli!! Mir fahre sofort zure Apothek zum di Medis hole. Di Organisation i däm „Chemist“ Lade isch ungloublech; zersch fragt eini was i für ne Wunsch ha u tuet mis Rezept ines Chörbli, si fragt öb i wöug warte oder öb si mir söu alüte wenns parat sig (hä? Dänki so für mi – das cha doch nid so lang ga!!), i warte natürlech (Reglä u Prisle warte dusse im Outo…) u beobachte dä Prozess, nach x Minute nimmt e zwöiti Agsteuti das Chörbli mit mim Rezept u töggelet öpis ine PC, e dritti geit de mau ga sMedi hole u e vierti chunnt zu mir u wott ikassiere (was für ne Arbeitsbeschaffig!), i frage wo de dWaschlotion sigi, si luegt mi fragend a u i säge ihre, dass dr Name vo däre Lotion ungedrah vo Hang sig häregschribe gsi u me jetz natürlech nume no dHeufti chönn läse wöu si dr zwöit Teu vom Rezept hei abgrisse :-/ , Bravo! Si macht sich uf dSuechi u nach ke Ahnig wi langer Zyt chumi de äntlech zu däne zwöi Sache, nid schlächt!!

…Höt füert üs dr Wäg zersch id Jewel Cave wo mir e riesigi mega faszinierendi Höhli gö ga aluege när nach Cape Leeuin zum südwestlechste Punkt vo Australien wo dr Southern u  dr Indian Pacific zäme chöme.

Irgendwie si si genau jetz wo mir ds Australien si überau am renoviere. Nachdämm mir scho nid hei chönne bimBusselton Jetty useloufe, isch hie dr Lüchtturm gsperrt u mir chöi nid ufe… Päch!!

Mir mache paar Föteli, luege üs no ds Wasserrad a wosi früener hei ds Wasser zum Lüchtturm ufepumpet, gniesse no es Stüngli dSunne amne härzige Strand ir Nöchi

u mache üs ufe Wäg nach Pemperton. Ds Wasser im Southern Pacific isch einiges cheuter aus im Indian Pacific… Leider!!

Wöu üs scho 2 Känguruhs si vorem Outo düre ghüpft u dSunne zimli schnäu unger geit, verbringe mir die Nacht ufem nächstbestä Campingplatz, wo däm Name definitiv nid grächt wird… zmitts im Waud ohni Strom u Wasser (Grass Tree Camping – hehe)…

Dienstag 09.02.2010                

Mir hei aui super gschlafe i däre Rueh vor Natur Nahrig hei mir ou gäng öpe gnue drbi, dass üses zMorge nid z churz chunnt. Gli mache mir üs ufe wäge zu dä Gigante. Mir mache Haut bim Dave Evens Bicentennial Karri Tree u stige di 130 Negu wo i Boum si gschlage worde u aus Leitere diene ufe bis uf 75m.

Auso ganz ungfährlech isch das ja nid… so ir Mitti heimer scho chli es muemigs Gfüu wemer mau e Blick nach abe wage. Dr Ufstig lohnt sich!! Dä Boum isch so höch, dass me wit ume über dGipfle vo dä angere Gigante gseht! Mir fahre witer ids Valley of the Giants u mache dr Tree Top sowie dr Ancien Empire Walk.

D Reglä isch vor Brügg wo bis 40m höch dür dBöim füehrt mindestens so fasziniert wi vo dä Böim Im Gägesatz zum Bicentennial Tree handlet sichs bi däne um red + yellow tingle trees wo nid so höch wi di Karri Trees wärde aber wime uf dä Föteli gseht viu e grössere Umfang hei…

Scho faszinierend dä Waud. U sowieso ischs faszinierend wi verschiedeni Gägende mir scho gseh hei u das obwou mir immer no im Weste vo Australie si!!

Mir finge dr schön Camping Caravan Park „Peaceful“ noch am Meer. Leider tuet dr Himmu grad zue wo mir üs ufe Wäg a Strand mache zum dr Tag la usklinge. I nütze di Glägeheit am länge Strand na öpe 1.5km hin u här ds seklä u mi Bewegigsdrang ds stiue Im Meer gani mi nume hurti schnäu ga abchüele wöu ds herannahende Gwitter mir doch chli Angst macht u i nid hie am Meer möchte grilliert wärde vomne Blitz :-/ Mir gniesse ou ume mau e aständigi Duschi. Es het e schöni Chuchi u Prisle u Reglä brätle feini Pouletflügeli ufem Gasgrill zum zNacht… Mhhh lecker!! Jetz hei mir dank Strom ume mau dMöglechkeit Fotokameras, Natels u dr Laptop ds lade. Reisebricht schribe, hei telefoniere oder wider mau es Buech läse isch üsi Beschäftigung höt vor em pfüsele…

Mittwoch 10.02.2010                

Happy Birthday Bruderherz, Steffu mir wünsche dir aues Guete zum 27igste!!

Mir fahre zum Greens Pool u dä Elephant Rocks ar WilliamBay.

Isch u schön aber ds Wätter macht nid würklech mit u mir lö ds bade. Wöus bewöukt isch hei mir Zyt u gö ga „Honey Wine“ e Honey Factory ga bsueche. Das Honigzügs isch nid so er Regläs Ding u drum choufe mir ke Honigwy. Ir Toffee Factory wo nid wit entfärnt isch choufe mir e Chilli/Passionfruit/Mayo u e Bushtomato Chutney. När teste mir ire Cheesfactory verschiedeni Chäse u choufe e Chilli Garlic u ne Swiss (isch ke Schwizer Chäs!). När hets du doch no uftah u mir lige für di letschte 2 Stüngli für äue leider paar Tag am Ocean Beach ds Denmark ad Sunne.

När bezieh mir grad näbe dran es Plätzli zum übernachte, brätle di rästleche Pouletflügeli u när gäng wi gäng, guet Nacht! 

Donnerstag 11.02.2010                

Mir schlafe us wöus gruusigs Wätter isch! Nachem zmörgele gömer ga Wood Works Gallery aluege wo üs dr Verchöifer im Tree Top Walk empfohle het…

Isch e ganz e coole Lade mit Schalene, Brieföffner, Schmuck, Skulpture, Chuchiutensielie; Salatbsteck, Pfäffermühline etc. Mir trinke e feini warmi Schoggi u witer geits id Edengate Blueberries Farm wos Confi, Chutneys, Essig etc. us Blaubeeri ds brobiere git.

Nid ds vergässe feine Blaubeeriportwy Hmm mir hei üs grad e Fläsche kouft!! Wöu äbe ds Wätter nid schön isch (totau bewöukt u Niesuräge ab und zue) hei mir Zyt Verschiedenes ads luege u nid fu am Strand ume ds lige – s het doch aus sini Vorteile…

D Verchöiferin vom Holzfactory git üs no paar Gratistips u mir gö imne Bushfood Center wo vomne Schwyzer Pärli sit 4 Jahr betriebe wird. Mir ässe Känguruh i verschiednig zuebereitete Arte u quetsche dBsitzerin no chli us was si drzue tribe het da häre ds cho.

D Claudia chunnt usprünglech vo Büren a. d. Aare, isch ds Dotzigen id Schueu, het när 15 Jahr ds Neuenburg gwohnt u du mit ihrem Ma entschiede hie so ne Bushfoodbeiz uf ds tue u ou möglechst aues säuber a ds pflanze. Si si vor 4 Jahr usgwanderet mit ihrne zwöi Meitschi wo mittlerwile 8i u 11i si wöu ihne ds Arbeitsläbe ir Schwiz ds stressig isch. Däheim redä si NUME wäutsch – so wachse dChing Französisch Englisch uf – nid schlächt. Mir gö dr Lowlands Beach ga aluege – wär schön gsi dört ds bädle aber ohni Sunne beschränke mir üs dFüess dri ds ha..

Bevor mir uf Albani witerfahre luegemer no d Torbay Glass Gallery a. S het paar schöni Sache aber mir hei meh erwartet. Ds Albany gö mir ufs Internet, regä üs tierisch uf wöu dVerbindig so langsam isch, gö ga ichoufe (müesse unbedingt Bier ha! ) u bezieh e Übernachtigsplatz im Albanys Gardens Holiday Resort.

Freitag, 12.02.2010                

Mir besichtige ds Schiff vo de erschtä Europäische Siedler vo Sydney wo ds Albany 1826 agleit hei. D Prislä u i hei di AU$ 6.- zaut u hei mit emne Telefon ir Hang bi 21 Plätz ufem Schiff chönne lose was anno dazumal so passiert isch… Isch krass wi uf engäm Ruum 61 Persone gläbt hei u nume di ranghöchste hei es eigets „Bäsechämmerli“ (grösser ischs würklech nid) zum übernachte gha. D Matrose hei imne öpe 1.4m höche Rum uf Hurdene müesse übernachte oder i Hängematte imne Eggeli.

D Reglä isch im Outo chli häre gläge, si schleppt scho paar Tag e Ercheutig mit sich… hoffentlech besseret de das gli ume :-/ Mir mache üs när ufe Wäg Klippe wo Australien vor Millione Jahr mau mit em Südpool (Antarktis) isch zämegwachse gsi ds besichtige.

Dört hets ou no e idrücklechi Natural Bridge u chli witer dr vo entfärnt es Blow Hole. Leider hets zweni Wäue das es würklech blaset u vili Touriste mache di 78 Stägetritte für nüt… ok für dFittnes schadet so öpis definitiv nie! U für üs lohnt sich dä Usflug wöu mir bim ufe ga e öpe 1.5m längi Schlange ufem Gehsteig gseh u sogar mau es Föteli chöi mache wöu si sich solang stiu het… erstundlecherwis isch das würklech scho di 4ti Schlange wo mir i freier Wiudbahn aträffe u üsi Schuehwau isch ume mau supervorbiudlech gsi…

Mir gö äbefaus ds Albani ga dWindfarm aluege mit 12 Windmühline u beschliesse bereits e Teu vor Strecki nach Esperance zrügg ds legä.

Mir übernachte hie ds Jerramungup ufemne günstige Caravanpark. Es het nume es Franzosepärli wo hie festsitzt wäge emne Defekt ar Benzinleitig. Süsch isch dä Platz bis uf ene Einsidler, em Bsitzer u emne zame Känguruh mit eim Ching läär…

Mir hei wöue Suppe für di Chrankä u Suppeagfrässne mache u drum zerschtä mau üse Gasherd inbetrieb gno… Sisch bim wöue blibe, mir hei chönne schrüble u mache aber Gas isch ke use cho… I frage dr Franzos um Hiuf aber är cha üs nid häufe… Zum Glück dörfe mir i ihrem VW Bus üses Süppli choche. Wöu aui ou mau froh si weme ihne hiuft, heimer bis jetz no keni unfründlechi Reisendi atroffe