Diplomfiir, Bagatello + Toufi vor Livia :-)

Das isch rächt es usgfüuts Programm gsi a däm Weekend…

Diplomfiir het am Friti Abe stattgfunge… Näbst viu blabla hei mir de üsi Diplom (sorry bi de Werkmeister u üs Projektleiter darf me das ja nid so nenne) bzw. Fachuswise dörfe entgägenäh. Zersch hei aui Werkmeister uf dBühni dörfe u de isch jede Einzu abegläse worde u dr Fachuswis bzw. ds Diplom isch überreicht worde…

Die beste Note si de no spezieu erwähnt worde u die bestä drü pro Lehrgang hei dr Geistlich Leimpreis bercho. Dr Überraschigseffekt het gfäut wöu si bir Firma Geistlich us Versehe di Schecks scho e Wuche ds früeh per Post OHNI Begleitbrief versändet hei.

Bi üs Projektleiter wos glich abgloffe isch hani mi natürlech gfröit dasi dr Scheck vo CHF 500.- für e 1. Rang no einisch i Form vo Schoggigäudmünze ha dörfe entgägenäh…

Leider heisi bi üs dDiplomarbeitsnote u nid Gsamtnote erwähnt u das het de im Gägesatz zu dä angere Lehrgäng relativ krass tönt mit mim 5.7

Bi däre Fiir hei sich di meischte tierisch ufgregt, dass dSchrinermeister sooooo spezieu si erwähnt worde… si wo Königsdisziplin absolvierte hei.. bla bla bla u dr Jörg, üse Schweizer des Jahres isch natürlech ou paar Mau spezieu erwähnt worde…

Auso i finge si sött für dKönigsdisziplin i Zuekunft e eigeti Diplomfiir mache!! u dr absolut Hammer hani gfunge, dass Borm nöierdings CHF 1000.- bzw. CHF 500.- für die beste Diplomarbeite het vergäh… zu mim Päch hets dä Pris NUME für üsi Königsdisziplinabsolvente gä :-/  :-/ …

Mir si du klassewis zäme ga zNacht ässe wöus ja bim VSSM nume no für es Apéro glängt het. När isch no Usgang agseit gsi

Am Samsti Nami bini ds Hedy u dr Sepp ume mau uf em Bürgenstock ga bsueche weni scho mau ume ir Nöchi bi gsi…

Am Abe si mis Gotti dIréne u ig ds Luzern ga Bagatello luege. Si si ächt mega lustig gsi… schad isch das ihri Abschiedstournée

Zum krönende Abschluss vo däm Weekend het a däm Wucheänd am Sunnti Toufi vo mim härzige Gottemeitschi Livia stattgfunge. I bi am Morge früeh usem Tösstal nach Busswil gfahre u gmeinsam mit Livias Family de angere Gottis simer richtig Chiuchgebäude gloffe wo di Toufi het stattgfunge. Ungerwägs heimer de no grad dr Götti u sini Familie abghout u si de aui gmeinsam di letschte Meter gloffe… Dr Gottesdienst isch erstuunlech interessant gsi wöu dKonfirmande ds Programm hei müesse gstaute.

Am Mittag nach dr eigentlech Toufi u em Gottesdienst simer bir Touffamilie däheim iglade gsi. Si hei säuber kochet u härzig dekoriert u mir hei e uu schöne u gmüetleche Namittag zäme verbracht. I ha Glück, ha ganz liebi Gotti u Göttigspändlis vor Livia

Es riesegrosses Merci ar Nadia u am Küsu für das wunderschöne Touffest u für ds Vertroue wo si mir aus usgwäuts Gotti entgägebringe…!! I ha öich megagärn