Weekend im Tessin :-))

Em Friti hani mi mit Steffu mim Brüetsch, em Jönu u de Phils ds Stansstad troffe. Vo dört us si mir zäme is Tessin gfahre, gnau gno ids härzige Dörfli Verdasio.

Churz vor Mitternacht simer acho, hei aus erschts grad agfüüret u gluegt wär wo cha schlafe.

D Feriewohnig vo dä Eutere vom Jönu isch uuu schön umboue, dört würds sich ou no lenger la wohne

Mim Gmüetszuestand entsprächend hani Lust gha uf enes Trinkspiu… di angere hei mitghoufe u drum isch dä Abe imne unspektakuläre aber lustige Trinkspiu usgartet

…u am Samsti simer ga wandere …nachdäm mir hei ufmöge u si ga ichoufe für de am Abe ds choche

Na ja shet nid für ne grossi Tour glängt u es isch schön gsi u mi het dr Vodka chönne useschwitze

Dr Jönu wird mi zwar erwürge wener das list wöu igs ihm scho öpe 10mau ha vorgworfe; er isch so schnäu losgwanderet, dass üs Wanderafänger ds Wandere grad zimlech isch verleidet

mir hei wi gseit nume e chlini Tour gmacht, trotzdem hani nachem Abstieg waggeligi Chnöi gha wöu die sich so “Sportarte” gar nid gwanet si…

Gli hei mir de afa choche - es het es Gmeinschaftswärk gä mir (bzw. dr Jönu) (Sorry Jönu ;-)  ) heis gschafft, dass dr Stocki nid isch guet cho (Salz u Gwürz vergässe u e z chlini Pfanne… *grins*)  usserdäm isch dRahmsauce nid richtig dick worde, dr Spinat hei mir zersch im Chüuschrank vergässe u bis de dä nache isch gsi, isch dr Stocki fasch chaut gsi - ja das mise en place isch id Hose…

u glich het mes schlussändlech chönne ässe u aui hei gnue gha.. am spetere Samsti Abe hei mir verschiedeni Fiume gluegt u i ha mir es Bad gönnt ir schöne freistehende Badwanne

zum Glück het nach mir niemer me müesse dusche, i ha nämlech aues warme Wasser brucht…

Am Sunnti heimer usgschlafe, dWohnig putzt u de isch scho Zyt gsi zum ds Tessin ume verlah, dass de emu am Mänti uma aui fit u munter si gsi zum ga schaffe

Isch schön gsi - merci Jönu fürs Organisiere!!

…