Geburiusflug uf Luzern u Nidwaude

Zu mim 28igschte hani es chlises Überraschigsreisli für mini Familie planet.

Gester am Morge simer so früeh wis Papis Chüe hei zueglah losgfahre… womer id Nöchi vo Luzern si cho het dsMami uf Ahieb errate wos häre geit.

Im Verchehrshuus vor Schwiz ds Luzern bini no gar nie gsi u wöui ja sit i ufem Bürgenstock id Witerbiudig ga öpe ds Luzern düre fahre oder im Usgang bi, hani dänkt das chönntme doch grad mit so emne Usflug kombiniere…

Mir si zersch e Stund ga Isebahne,

Verschidenes,

Flugzüg,

Velos,

U-Boot,

u Zeppeline aluege.

Speter si mini Brüetschte u i ids IMAX Kino ga e Dinosaurier 3D Fium aluege, nid schlächt di Würkig

Ds zwöite Highlight isch für Steffu u mi nachem Kino dr Flugsimulator gsi… dä wo rächts hocket cha ds Stür sim Co Pilot übergäh und nach Beliebe wider übernäh. Mir hei eigentlech ds Gfüu gha me oder weniger e Looping häre bercho ds ha aber vo usse heig das schins chli angersch usgseh die Erfahrig ischs uf jede Fau wärt u mi cha zum Glück nid abstürze… Chlei schlächt isch mir du scho worde!

Bevor mir äntlech ufbroche si zum ga ässe heimer no üsi Reaktion im Strasseverkehr testet u si mau Outo gfahre mit ds viu pro Mille… sprich mit igschränktem Blickfäud u wahnsinnige verlengerete Reaktionszyte…

Aus zwöiti Überraschig simer du zu Hedy u Sepp uf dEgg mega fein ga viergängig ässe. Dr Marcel het chum ds Dessert möge - das heisst de öpis

Merci viu mau Hedy u Sepp, bis nächst Wuche!!

Dr Papi u dr Markus si früener gange wöu däheim 15 Chüeh hei Hunger gha u uf ds mäuche hei gwartet..

Leider ischs o füre Räst vor Familie scho Zyt worde zum heiga

Mi fröits dass sich di ganzi Familie het Zyt gno zum e gmeinsame Tag ds verbringe!

Zum dä schön Tag wo viu ds schnäu verbi isch ab ds runde hei Steffu u i dIdee gha “Little Miss Sunshine” u “Amelie” ds luege… Zwöi ächt bezouberndi Fiume…