Wiehnachte 2008 ds Kallnach ds Bern u ds Bauma

Nachdäm i am 24igste Dezember du öpe am 11i äntlech usem Spitau bi entlah worde, het mi dr Dario gmüetlech mit zwüschehaut ir Raststätt Würenlos hei uf Kallnach chauffiert. Merci Däru!!

I häts zwar nid zuegäh bi aber vor Operation wo am Vortag stattgfunge het no rächt KO gsi u no chli ufem Sofa umegläge bis nachem Stau di ganzi Familiä komplett isch gsi.

Ds Mori -”Wiehnachtsrituau” isch sowit glich abgloffe wi die letschte paar Jahr: Raclette ässe, Kerzli azünde, Päckli uspacke , Dessert ässe usw. Nume ds Singe heimer das Jahr definitiv wäg gla wöu grad niemer so Singlust het gha daser die angere hät chönne überschnure… Nach ere Rundi “Activity” mit mine Brüetsche simer aui ga lige. I has gnosse ohni ohrebetäubends Schnarchle vomne Spitaugspändli chönne ds schlafe u nid am haubi achti zum Bluetdruckmässe gweckt ds wärde…

Am 25. het üs dr Steffu zum Wiehnachte fiire uf Bern iglade. Dr Markus u i si mit ihm scho früehner uf Bern gfahre zum no ufrume u aues parat mache… Mir hei no chli Zyt gha u aui drü mindestens zum dritte Mau Titanic gluegt… o diesmau isch dr Leonardo erfrore

Wöu mir dr Fium glich hei fertig gluegt simer mit trotz vorher e huufe Zyt plötzlech ds spät drann gsi mit choche u dEutere si usnahmswis (sorry) mau überpünktlech gsi. Dr Steffu het Filet im Teig kouft u drzue dMorchelsauce säuber gmacht… i ha dörfe (müesse) häufe.

Ds Ässe isch superfein gsi, nächhär heimer e Verdouigsrundi Activity gspiut. Dr Papi dr Steffu u i hei gäge Markus, Marcel u Mami gwunne jupieeehh :-) Speter hei nümme aui Dessert möge…

Khôi, Silvan, Ädu u Betty em Steffu sini beschtä Fründe si nach ihrem Familieschluch verbi cho. D Eutere si de gli hei u mir hei 3 Rundine gspiut - 4 gäg 4…

Dr Abe isch ersch so strub worde wis uf eim Föteli usgseht nachdem dr Steffu nume no mit sine Kollege isch übrig blibe u si ds Sabine - Trinkspiu gspiut hei I wär da normalerwiis wortwörtlech vou dr bi aber di erschte Azeiche vore Grippe si im Azug gsi u i ha überhoupt nümme lenger möge blibe…

Am 26. si Prisle u i im Kino ds Biel ga “Australia” luege. Är isch chli kitschig aber süsch mega guet! Am Abe isch ir Konzerthalle ds Kallnach bereits Vorsilvesterparty gsi u mir hei ds haube Dorf atroffe.

Vom 27. bis höt bini mis Gotti u ihri Familie ga bsueche. Mir gfauts immer sehr guet im Tösstal u i danke für dGastfründschaft!! I hoffe dass sich ab mim Gschänk niemer dKnoche bricht..!