Bsuech ds Chrüzlinge 8.-9.03.08

I ha mi gfröit, dass es mini Eutere mi doch no i mim erschte Jahr ds Chrüzlinge si cho bsueche. Gäge Mittag hei si uf Ahieb dr Wohnblock gfunge wo Karin u i drinne wohne. Nachemne Kaffee und Berliner bini ihne mi Arbeitsplatz uf Sulgen ga zeige. Si si gloub rächt überrascht gsi e sone grossi Schrinerei adsträffe.

Nachhär si mir Konstanz ga besichtige (i füf Minute ischme vo mir däheim us ir Autstadt), speter am See nah gloffe u ds Sealife Aquarium ga bsueche…

Dr Sunti het ganz gmüetlech agfange. Nachdäm mir zum Fänschter us hei gluegt, het sich jede gärn no mau im Bett umdräit wöu dr Näbu so dick isch gsi dasme nid wit het gseh. Am eufi hets ds zMorge gä u de simer nach Neunkirch im Kt. Schaffhausen gfahre ga dHeimat vom Mami bsueche… ds Wätter isch gäng schöner worde u het sich zumne wunderschöne Früehligstag entwicklet, so dass mir ohni Jagge si ume gspaziert.

Ufem Heiwäg heimer e Haut bim Rheinfall gmacht, shet ni viu Wasser im Moment. Mir hei gstuunet wo mir so viu Fische hei gseh wo sich mit Schwän u Ente um ds Brot hei gstritte wo Touriste ids Wasser hei gheit!